రోడ్డు ప్రమాదాల నివారణకు బహుముఖ వ్యూహం
కలెక్టర్పమేలా సత్పతి
కాకతీయ, కరీంనగర్ : జిల్లాలో రోడ్డు ప్రమాదాలను అరికట్టేందుకు కలెక్టర్ పమేలా సత్పతి ఆధ్వర్యంలో మంగళవారం కలెక్టరేట్ లో రోడ్ సేఫ్టీ కమిటీ సమావేశం జరిగింది. సమావేశంలో సీపీ గౌష్ ఆలం, నేషనల్ హైవే అథారిటీ, ఆర్ అండ్ బీ, రవాణా శాఖ, ఆర్టీసీ, పంచాయతీ రాజ్ శాఖ అధికారులు పాల్గొన్నారు. ప్రధానంగా రోడ్డు ప్రమాదాల నివారణ, భద్రతా చర్యలపై సమగ్ర సమీక్ష జరిపారు. పవర్ పాయింట్ప్రజెంటేషన్ ద్వారా ప్రమాదాలు ఎక్కువగా జరగుతున్న ప్రాంతాలపై అవగాహన కల్పించారు. ఈ సందర్భంగా కలెక్టర్ పమేలా సత్పతి మాట్లాడుతూ ప్రజలు ట్రాఫిక్ నియమాలు పాటించాలని, అవగాహనతోనే రోడ్డు ప్రమాదాలను నివారించవచ్చన్నారు. పోలీస్, మున్సిపల్, నేషనల్ హైవే, ఆర్టీసీ అధికారులు సమష్టి కృషితోనే సాధ్యమన్నారు. అతివేగం, నిర్లక్ష్యం, మద్యం సేవించి డ్రైవ్ చేయడం ప్రధాన కారణాలుగా గుర్తించబడ్డాయని, ఈ సమస్యలను తగ్గించేందుకు డిఫెన్సివ్ డ్రైవింగ్, పరిసరాలను గమనిస్తూ వాహనాలను నడపాలని పేర్కొన్నారు. అత్యధిక ప్రమాదాలు జరగే ప్రాంతాల్లో ప్రత్యేక భద్రతా ఏర్పాట్లు చేపట్టాలని ఆదేశాలు జారీ చేశారు. కరీంనగర్ సీపీ గౌష్ ఆలం మాట్లాడుతూ జిల్లా లోని ప్రధాన రూట్లపై బ్లాక్ స్పాట్లను గుర్తించి భద్రతా చర్యలు అమలు చేస్తున్నట్లు తెలిపారు. వేగం, రాంగ్ రూట్ డ్రైవింగ్, డ్రంక్ అండ్ డ్రైవ్ జరిమానాలు విధిస్తున్నామని, వాహన దారులు హెల్మెట్ తప్పనిసరిగా ధరించాలన్నారు.‘అరైవ్ అలైవ్’ కార్యక్రమం జిల్లాలో విస్తృతంగా అమలు అవుతున్నదని, ట్రాఫిక్ సిగ్నల్స్, పార్కింగ్ నియమాలపై ఎప్పటికప్పుడు పర్యవేక్షణ జరుగుతుందని తెలిపారు. సమావేశంలో మున్సిపల్ కమిషనర్ ప్రఫుల్ దేశాయ్, ఆర్టీవో శ్రీకాంత్ చక్రవర్తి, ఏసీపీలు విజయకుమార్, వెంకటస్వామి, శ్రీనివాస్ జి, యాదగిరి స్వామి, సీఐలు, ఎస్సైలు, అధికారులు పాల్గొన్నారు.
