ప‌ల్లె పోరు షూరు
పంచాయతీ ఎన్నిక‌ల‌తో రాజకీయ వేఢీ
ఉమ్మడి కరీంనగర్ జిల్లాలో 1224 జీపీల‌కు ఎన్నికలు
11,14,17 తేదీల్లో మూడు విడ‌త‌ల్లో పోలింగ్
ప‌ల్లె లీడ‌ర్లే.. ఎమ్మెల్యేల‌కు పొలిటిక‌ల్ పిల్లర్స్
భ‌విష్య‌త్ రాజ‌కీయానికి వారి గెలుపు ముఖ్య‌మే
హోరాహోరీగా సాగ‌నున్న ఎన్నికల ర‌ణం
కాకతీయ, కరీంనగర్ బ్యూరో : ప‌ల్లె పోరు షూరువైంది. పంచాయతీ ఎన్నికల ప్ర‌క‌ట‌న‌తో పల్లెల్లో రాజ‌కీయం ఒక్క‌సారిగా వేడెక్కింది. స‌ర్పంచ్ కావాల‌నేది గ్రామ స్థాయి నేత‌ల్లో ఒక క‌ల‌గా ఉంటుంది. ఆక‌ల‌ను ఇప్పుడు నెర‌వేర్చుకునేందుకు విశ్వ‌ప్ర‌య‌త్నాలు మొద‌ల‌య్యాయి. గ్రామ రాజ‌కీయంపై ప‌ట్టున్న నేత‌లు.. ఎమ్మెల్యే స్థాయి ప్రజాప్ర‌తినిధుల‌తో చ‌నువుగా ఉండే.. ప్రధాన అనుచ‌రులుగా ఉన్న నేత‌లు సైతం స‌ర్పంచ్ బ‌రిలో నిలిచేందుకు ఉవ్విళ్లూరుతుండ‌టం గ‌మ‌నార్హం. స‌ర్పంచ్ కావ‌డం అనేది స్వ‌ప్నంగా ఐదేళ్లు క‌ళ్లు కాయ‌లు కాసేలా ఎన్నికల కోసం ఎదురు చూసిన నేత‌లు ఇప్పుడు రాజకీయ బ‌రిలోకి దిగేందుకు సిద్ధ‌మ‌య్యారు. గత ఎన్నికల్లో ఒట‌మి పాలైన వారు మ‌రోసారి తమ అదృష్టాన్ని ప‌రీక్షించుకునేందుకు సిద్ధ‌మ‌వుతుండ‌గా.. గత ఎన్నికల్లో విజయం సాధించిన ఐదేళ్లు ప‌రిపాల‌న కొన‌సాగించిన వారు.. ఐదేళ్లు చేసిన అభివృద్ధి, సేవ‌ల‌ను గుర్తు చేస్తూ ఎన్నిక‌ల‌కు వెళ్లేందుకు సిద్ధ‌మ‌వుతుండ‌టం గ‌మ‌నార్హం.
ఎమ్మెల్యేల‌కు ప‌ల్లె లీడ‌ర్లే పిల్లర్స్
మాజీ ఎమ్మెల్యేల‌కు, ఎమ్మెల్యేల‌కుప‌ల్లె లీడ‌ర్లే పిల్లర్స్ అని చెప్పాలి. తమ విజ‌యంలో.. రాజకీయ అండ‌దండ‌ల్లో ముందున్న ప‌ల్లె లీడ‌ర్ల‌ను ప్ర‌జాప్ర‌తినిధులుగా గెలిపించుకునే బాధ్య‌త ఇప్పుడు పెద్ద లీడ‌ర్ల‌పై ప‌డింది. దీంతో పార్టీ గుర్తులపై జ‌రిగే ఎన్నికలు కాకున్నా.. ప‌రోక్షంగా మ‌ద్ద‌తిస్తూ.. పార్టీ బ‌ల‌ప‌ర్చిన అభ్యర్థి పేరిట ఇప్పుడు బ‌రిలోకి దింపి గెలిపించే బాధ్య‌త‌ను భుజ‌స్కంధాల‌పై వేసుకుంటున్నారు. ఆరు నూరైనా.. నూరు నూట‌య్యాబై అయినా.. స‌ర్పంచ్ అయి తీరాల్సిందేనంటూ ఒక్కో ఊరి నుంచి 10 నుంచి 20 మంది ఆశావ‌హులు బ‌రిలో నిలిచేందుకు ఉవ్విళ్లూరుతుండ‌టం గ‌మ‌నార్హం. ఇందులో రాజకీయ ప‌రిప‌క్వ‌త ఉన్న నేత‌లు..రాజకీయ ఉత్సాహం తొణికిస‌లాడుతున్న యువ‌త, అవ‌కాశం-అవ‌స‌రం, కుల స‌మీక‌ర‌ణం, ఇలా ఏ చిన్న పాజిటివ్ అంశమున్న బ‌రిలోకి దూకేందుకు ఆస‌క్తి క‌న‌బ‌రుస్తుండ‌టం గ‌మ‌నార్హం.
ఐదు ల‌క్ష‌లైనా ఫ‌ర్వాలేదు.. స‌ర్పంచ్ అయి తీరాల్సిందే..!
గ్రామ స‌ర్పంచ్ క‌ల‌కు ఆర్థిక అంశ‌మూ కీల‌కంగానే మారుతుంద‌న్న విశ్లేష‌ణ‌లున్నాయి. ఎంత ప‌వ‌రున్న లీడ‌రైనా.. ఖ‌ర్చ‌యితే కామ‌నే. 1000 ఓట్లున్న గ్రామ పంచాయ‌తీకి పోటీ చేసే అభ్య‌ర్థికి క‌నీసం రూ.5లక్షల ఖర్చు పెట్టాల్సిందేనంటూ ఒక అభిప్రాయం గ్రామ రాజకీయాల్లో చ‌ర్చ జ‌రుగుతోంది. వాస్త‌వానికి ఇది మాములేనంట. అభ్యర్థి, ప్ర‌త్య‌ర్థి, స‌మీక‌ర‌ణాల.. డిమాండ్ చేస్తే ఆ ఖర్చు ట్రిపుల్ అయినా ఆశ్చ‌ర్యం లేదు. అందుకే ఆశావ‌హులు ఆర్థిక అంశాల‌ను దృష్టిలో ఉంచుకుని మ‌నీ మ్యాట‌ర్‌లో ప్రీ ప్లాన్‌డ్‌గానే వ్య‌వ‌హ‌రించిన‌ట్లుగా తెలుస్తోంది. మొదటి ఫేజ్‌లో ఉన్న నేత‌ల‌కు కాస్త ఖర్చు త‌క్కువ‌గా ఉండే అవ‌కాశం ఉండ‌గా.. మూడో ఫేజ్‌లో ఎన్నికలు జ‌రిగే చోట్లా మాత్రం ఖర్చు ఎక్కువ‌గానే అయ్యే అవ‌కాశం ఉంద‌న్న చ‌ర్చ జ‌రుగుతోంది. ఎందుకంటే ఇప్పటి నుంచే రోజూ సిట్టింగ్‌లే జ‌ర‌పాల్సి ఉంటుంద‌ని ఆశావ‌హులు అభిప్రాయం వ్య‌క్తం చేస్తుండ‌టం గ‌మ‌నార్హం.
క‌రీంన‌గ‌ర్‌లో ఇదీ లెక్కా..!
గ్రామపంచాయతీ సాధారణ ఎన్నికల ప్రక్రియ ప్రారంభమవడంతో ఉమ్మడి కరీంనగర్ జిల్లాలో గ్రామీణ రాజకీయాలు వేడెక్కాయి. కరీంనగర్ జిల్లాలో 15 మండలాల్లో 316 గ్రామ పంచాయతీలలోని 2946 వార్డులకు, జగిత్యాల జిల్లాలో 20 మండలాల్లో 385 గ్రామపంచాయతీలలోని 3536 వార్డులకు, పెద్దపల్లి జిల్లాలో 13 మండలాల్లో 263 గ్రామపంచాయతీలలోని 2432 వార్డులకు, రాజన్న సిరిసిల్ల జిల్లాలో 12 మండలాల్లో 260 గ్రామపంచాయతీలలోని 2268 వార్డుల కోసం ఎన్నికలు జరుగ‌నున్నాయి. ఉమ్మడి కరీంనగర్ జిల్లాలో గ్రామీణ రాజకీయ వాతావరణం ఇప్పటికే ఉత్కంఠకు చేరింది. బీజేపీ, కాంగ్రెస్, బీఆర్ఎస్ మూడు ప్రధాన పార్టీలు త్రిముఖ పోరుకు పూర్తిగా సిద్ధమయ్యాయి.
బండి సంజయ్ న‌జ‌రానా..! ప్ర‌క‌ట‌న..!
ప్రతి పార్టీ తమ అభ్యర్థులను గెలిపించడానికి వర్గాల మద్దతు, స్థానిక నాయకుల ప్రభావం, గ్రామస్థుల ఆకాంక్షలను దృష్టిలో ఉంచుకుని వ్యూహాత్మకంగా ముందుకు కదులుతున్నాయి. బీజేపీ విజయవంతమైతే కొన్ని గ్రామాలకు ప్రత్యేకంగా రూ.10 లక్షల ఎన్నికల న‌జ‌రానా ఇస్తామ‌ని హ‌మీ ప్రకటించింది. కాంగ్రెస్ పార్టీ అభ్యర్థులు విజయం సాధిస్తే గ్రామీణ అభివృద్ధి వేగవంతమవుతుందని సీఎం రేవంత్ రెడ్డి ఇప్పటికే వెల్లడించారు. బీఆర్ఎస్ పార్టీ స్థానిక రాజకీయ పునాదులను మరింత దృఢం చేసుకోవాలని ప్రతీ పంచాయతీ పరిధిలో తమ ఆధిపత్యాన్ని పెంచాలని లక్ష్యంగా వ్యుహ‌త్మ‌కంగా వ్య‌వ‌హ‌రిస్తుంది. ప్రతి పార్టీ స్థానిక వ్యూహాలను అమలు చేస్తూ గ్రామీణ వర్గాలను ఆకర్షించడానికి ప్ర‌ణాళిక‌లు అమలు చేస్తుంది. బండి సంజయ్ బీజేపీ తరఫున, మంత్రులు పొన్నం ప్రభాకర్, శ్రీధర్ బాబు, వడ్లూరి లక్ష్మణ్ కుమార్ కాంగ్రెస్ తరఫున, హరీష్ రావు బీఆర్ఎస్ తరఫున గ్రామాల్లో ప‌ర్య‌ట‌న‌లు, అభివృద్ది కార్య‌క్ర‌మాలు చేప‌డుతూ తమ అభ్యర్థుల కోసం మద్దతు సంపాదించేందుకు ప్రయత్నిస్తున్నారు. ప్రతి పార్టీ గ్రామీణ రాజకీయాల్లో తమ ఆధిపత్యాన్ని చూపించడానికి ప్రతి ఒక్క గ్రామం, ప్రతి పంచాయతీని వ్యూహాత్మకంగా ఉపయోగిస్తోంది. మూడు ప్రధాన పార్టీల త్రిముఖ పోరుతో ఉమ్మడి కరీంనగర్ జిల్లాలో ప్రతి పంచాయతీ, ప్రతి గ్రామాన్ని ఉత్కంఠ‌భ‌రిత మార్చి వేసింది. వర్గపోరు, అభ్యర్థుల వ్యక్తిగత ప్రాధాన్యత, పార్టీ వ్యూహాలు ఫలితాలను నిర్ణయించే కీలక అంశాలుగా మారడంతో గ్రామీణ రాజకీయాలు ఈ ఎన్నికల్లో సరికొత్త హీట్, ఆసక్తిని తార స్థాయికి పెంచుతున్నాయి. రాజకీయ రంగంలో ఏర్పడిన ఏన్నిక‌ల పోరు గ్రామస్థుల మధ్య వర్గపోరు, నాయకుల మద్దతు కోసం జరుగుతున్న పోరాటం, స్థానిక అభివృద్ధి హామీల పరంగా పార్టీలు కట్టుబడటం కరీంనగర్ జిల్లాను ఈ ఎన్నికల్లో కేంద్రబిందువుగా మారుస్తోంది.
11, 14, 17 తేదీల్లో మూడు విడ‌త‌ల్లో పోలింగ్
కరీంనగర్ జిల్లాలోని 15 మండలాల్లో 316, గ్రామపంచాయతీలు, 2946 వార్డులకు ఎన్నికలు జరగనున్నాయి. జగిత్యాల జిల్లాలో 20 మండలాలకు గాను 385 గ్రామ పంచాయతీలు, 3536 వార్డులు, పెద్దపల్లిలో 13 మండలాల్లోని 263 గ్రామ పంచాయతీల గాను 2432 వార్డులకు, రాజన్న సిరిసిల్ల జిల్లాలో 12 మండలాలలో 260 గ్రామపంచా యతీలకు 2260 వార్డులకు ఎన్నికలు జరగనుండగా ఉమ్మడి జిల్లా వ్యప్తంగా గ్రామపంచాయతీ వార్డులకు ఎన్నికలు మొదటి, రెండవ, మూడవ విడుతల్లో జరగనున్నాయి. మొదటి విడత ఈనెల 27 నుంచి డిసెంబర్ మూడో తేదీ వరకు నామినేషన్లు స్వీకరించనున్నారు. 11న ఎన్నికలు జరగనున్నాయి. రెండో విడత ఈనెల 30 నుంచి డిసెంబర్ 6 వరకు నామినేషన్లు స్వీకరించనుండగా డిసెంబర్ 14న ఎన్నికలు జరుగుతాయి. మూడో విడత డిసెంబర్ 3. నుంచి 9 వరకు నామినేషన్లు స్వీకరించనున్నారు 17న ఎన్నికలు జరగనున్నాయి. ఎన్నికలు జరిగిన రోజే మధ్యాహ్నం రెండు గంటల నుంచి ఓట్ల లెక్కింపు జ‌ర‌గ‌గా అదే రోజు విజేతలను ప్రకటిస్తారు.
