మారేడుమిల్లిలో మరో ఎన్కౌంటర్..! ఏడుగురు మృతి
కాకతీయ, ఏపీ బ్యూరో : ఆంధ్రప్రదేశ్‌లోని అల్లూరి సీతారామరాజు జిల్లా మారేడుమిల్లి అటవీ ప్రాంతంలో బుధవారం జరిగిన మరో ఎన్‌కౌంటర్‌లో ఏడుగురు మావోయిస్టులు మృతి చెందారు. ఈ ఎన్‌కౌంటర్‌ను ఏపీ ఇంటెలిజెన్స్ అదనపు డీజీపీ మహేష్ చంద్ర లడ్డా ధృవీకరించారు. మృతులలో మావోయిస్ట్ అగ్రనేతలు దేవ్‌జీ అలియాస్ తిప్పిరి తిరుపతి, అజాద్, మరియు మెట్టూరి జోగా రావు అలియాస్ టెక్ శంకర్ ఉన్నట్లు గుర్తించారు. శంకర్ ఆంధ్ర-ఒడిశా సరిహద్దు (AOB) ఇన్‌ఛార్జ్ సెంట్రల్ కమిటీ సభ్యుడు. గత 24 గంటల్లో ఇదే ప్రాంతంలో జరిగిన ఇది రెండవ ఎన్కౌంటర్. మంగళవారం (నవంబర్ 18, 2025) జరిగిన ఎన్‌కౌంటర్‌లో మావోయిస్టు కేంద్ర కమిటీ సభ్యుడు హిడ్మా, అతని భార్యతో సహా ఆరుగురు మావోయిస్టులు హతమయ్యారు. ఈ ఆపరేషన్లలో భాగంగా పోలీసులు వివిధ జిల్లాల్లో దాదాపు 50 మంది మావోయిస్టు సానుభూతిపరులను అరెస్టు చేశారు. ఈ ఎన్‌కౌంటర్లు మావోయిస్టు ఉద్యమానికి పెద్ద ఎదురుదెబ్బగా పోలీసులు భావిస్తున్నారు.
మిగిలిన మావోయిస్టులు లొంగిపోవ‌డం మంచిది : ఏపీ ఇంటెలిజెన్స్ ఏడీజీ మ‌హేశ్‌చంద్ర లడ్డా
మిగిలి ఉన్న మావోయిస్టులు లొంగిపోతే మంచిదని ఆంధ్రప్రదేశ్ ఇంటెలిజెన్స్ అడిషనల్ డైరెక్టర్ జనరల్ మహేష్ చంద్ర లడ్డా స్ప‌ష్టం చేశారు. “ప్రభుత్వం తగిన సమయంలో వారికి పునరావాసం మరియు మద్దతును అందించగలదు, తద్వారా వారు సగౌరవంగా జీవించగలరు” అని పేర్కొన్నారు. మావోయిస్టు ఉద్యమంలో ఉన్నవారు హింసను వీడి ప్రధాన స్రవంతిలో కలవాలని ఆయన సూచించారు
