బెంగళూరు ‘లేడీ డాన్’ యశస్వినీ గౌడ అరెస్ట్
రియల్ ఎస్టేట్ వ్యాపారి కిడ్నాప్ కేసులో కీలక చర్య
కాకతీయ, నేషనల్ డెస్క్ : కర్ణాటక రాజధాని బెంగళూరులో సంచలన పరిణామం చోటుచేసుకుంది. నగరంలో ‘లేడీ డాన్’గా పేరొందిన యశస్వినీ గౌడను సెంట్రల్ క్రైమ్ బ్రాంచ్ (సీసీబీ) పోలీసులు అరెస్ట్ చేశారు. రియల్ ఎస్టేట్ వ్యాపారి కిడ్నాప్ కేసులో నిందితుడిని కాపాడే ప్రయత్నం చేసి, పోలీసుల విధులకు ఆటంకం కలిగించినందుకు ఆమెపై చర్యలు తీసుకున్నారు. పోలీసుల వివరాల ప్రకారం… గతేడాది ఆగస్టులో బెంగళూరుకు చెందిన ఓ రియల్ ఎస్టేట్ వ్యాపారిని కొందరు దుండగులు కిడ్నాప్ చేశారు. వ్యాపారి నుంచి రాజేష్ అనే వ్యక్తి రూ.1.20 లక్షలు అప్పుగా తీసుకున్నాడు. ఆ మొత్తాన్ని తిరిగి ఇవ్వాలని బాధితుడు ఒత్తిడి చేయడంతో రాజేష్ అతనిపై కక్ష పెంచుకున్నాడు. డబ్బులు తిరిగి ఇస్తానని నమ్మబలికి వ్యాపారిని కారులో తీసుకెళ్లి బెదిరించి, మరికొంత నగదును బలవంతంగా బదిలీ చేయించుకున్నాడు. ఈ ఘటనపై కేసు నమోదు చేసిన సీసీబీ పోలీసులు ప్రధాన నిందితుడు రాజేష్ను అరెస్టు చేసేందుకు ప్రయత్నించారు. అయితే ఈ సమయంలో యశస్వినీ గౌడ రంగంలోకి దిగింది. పోలీసులపై ఒత్తిడి తెచ్చి, అరెస్టును అడ్డుకునేందుకు ప్రయత్నించింది. విధులకు ఆటంకం కలిగించడమే కాకుండా అధికారులను బెదిరించినట్లు పోలీసులు పేర్కొన్నారు. దీంతో నిందితుడికి సహకరించడమే కాకుండా పోలీసుల పనిని అడ్డుకున్న అభియోగాలపై యశస్వినీ గౌడను అదుపులోకి తీసుకున్నారు. ఆమెపై ఇప్పటికే బెంగళూరులోని పలు పోలీస్ స్టేషన్లలో ఏడుకు పైగా క్రిమినల్ కేసులు నమోదై ఉన్నాయని అధికారులు తెలిపారు. తాజా కిడ్నాప్ వ్యవహారంలో ఆమె పాత్రపై సీసీబీ అధికారులు లోతుగా విచారణ జరుపుతున్నారు. ఈ అరెస్టుతో నగర అండర్వరల్డ్ కార్యకలాపాలపై మరిన్ని కీలక విషయాలు వెలుగులోకి వచ్చే అవకాశముందని పోలీసు వర్గాలు పేర్కొన్నాయి.
 పోలీసులు){kind=link}