పండుగ వాతావరణంలో ‘విలువల విద్యాసదస్సు’
పెద్దఎత్తున పాల్గొన్న విద్యార్థులు, ఉపాధ్యాయులు
ఆకట్టుకున్న విద్యార్థుల సాంస్కృతిక కార్యక్రమాలు
విద్యార్థుల ప్రశ్నలకు సమాధానాలు ఇచ్చిన బ్రహ్మశ్రీ చాగంటి కోటేశ్వరరావు
కాకతీయ, ఏపీ బ్యూరో : విద్యాశాఖ ఆధ్వర్యంలో విజయవాడలోని తుమ్మలపల్లి క్షేత్రయ్య వారి కళాక్షేత్రంలో నిర్వహించిన ‘విలువల విద్యాసదస్సు’ ఆద్యంతం పండుగ వాతావరణంలో జరిగింది. ఈ వేడుకకు ముఖ్య అతిథులుగా విద్య, ఐటీ శాఖల మంత్రి నారా లోకేష్ గారు, ప్రవచన వాచస్పతి, ఆంధ్రప్రదేశ్ ప్రభుత్వ నైతిక విలువల సలహాదారులు బ్రహ్మశ్రీ చాగంటి కోటేశ్వరరావు గారు హాజరయ్యారు. ఈ సందర్భంగా బ్రహ్మశ్రీ చాగంటి కోటేశ్వరరావు గారి ప్రవచన కార్యక్రమం ఏర్పాటుచేయడం జరిగింది. ముందుగా తుమ్ములపల్లి కళాక్షేత్రానికి చేరుకున్న మంత్రి లోకేష్ గారు, బ్రహ్మశ్రీ చాగంటి కోటేశ్వరరావు గారికి పూర్ణకుంభంతో స్వాగతం పలికారు. ఈ సందర్భంగా బ్రహ్మశ్రీ చాగంటి కోటేశ్వరరావు గారికి కాళ్లకు నమస్కారం చేసి పెద్దలు, గురువుల పట్ల తన గౌరవ భావాన్ని మంత్రి నారా లోకేష్ గారు చాటుకున్నారు. ముందుగా జ్యోతి ప్రజ్వలన చేసి కార్యక్రమాన్ని లాంఛనంగా ప్రారంభించారు. పండితులతో అతిథులకు వేదాశీర్వచనం అందజేశారు. ఈ సందర్భంగా ఏర్పాటుచేసిన విద్యార్థుల సాంస్కృతిక కార్యక్రమాలు ప్రతి ఒక్కరిని ఆకట్టుకున్నాయి.
బ్రహ్మశ్రీ చాగంటి కోటేశ్వరరావు గారికి ఘనంగా సత్కారం
“విలువల విద్యాసదస్సు”లో బ్రహ్మశ్రీ చాగంటి కోటేశ్వరరావు గారి ప్రవచనం అనంతరం విద్యార్థుల ప్రశ్నలకు మంత్రి నారా లోకేష్ గారు, చాగంటి కోటేశ్వరరావు గారు సమాధానాలు ఇచ్చారు. అనంతరం బ్రహ్మశ్రీ చాగంటి కోటేశ్వరరావు గారిని మంత్రి నారా లోకేష్ గారు, సభాధ్యక్షులు, ప్రభుత్వ విప్ బోండా ఉమామహేశ్వరరావుగారు ప్రత్యేక జ్ఞాపిక, శాలువాతో ఘనంగా సత్కరించారు. ఈ వేడుకలో పెద్దఎత్తున విద్యార్థులు, ఉపాధ్యాయులు పాల్గొన్నారు.
