అనుకోని అదృష్టం.. రూ.81 కోట్లకు అమ్ముడైన పాత కామిక్ బుక్‌!
శాన్‌ఫ్రాన్సిస్కో సంచలనం
తల్లి ఇంటిని శుభ్రం చేస్తుండ‌గా దొరికిన సూపర్‌మ్యాన్ కామిక్ బుక్‌
రాత్రికి రాత్రే కోటీశ్వరులైన ముగ్గురు సోదరులు
కాకతీయ, ఇంట‌ర్నేష‌న‌ల్ : వారసత్వంగా వచ్చిన ఇంటిని అమ్మే క్రమంలో నిండా జ్ఞాపకాలతో కూడిన ఆపుర్వమైన ప్రయాణం మొదలవుతుంది. కానీ ఆ ప్రయాణం ముగ్గురు యువకులకు రాత్రికిరాత్రే కోటి కోట్లు ఆర్జించే అదృష్టాన్ని తెస్తుందని ఎవరు ఊహిస్తారు? అమెరికాలోని శాన్‌ఫ్రాన్సిస్కోలో చోటుచేసుకున్న ఈ నిజ జీవిత కథ ఇప్పుడు అంతర్జాలంలో వైరల్‌గా మారింది.
తాజాగా శాన్‌ఫ్రాన్సిస్కోకు చెందిన ఓ మహిళ కన్నుమూయడంతో ఆమె ముగ్గురు కుమారులు తల్లి పేరు మీద ఉన్న ఇంటిని అమ్మేయాలని నిర్ణయించుకున్నారు. అమ్మ ఇంటిని చివరిసారిగా శుభ్రం చేస్తూ, పాత సామాన్లను తొలగిస్తుంటే ఓ పాతకాలం నాటి సూపర్‌మ్యాన్ కామిక్ పుస్తకం వారి దృష్టికి పడింది. మసకబారిన కవర్‌, పాత పేజీలు.. కానీ అందులో దాగి ఉన్న విలువ మాత్రం ఊహకు అందనిది. ఆ కామిక్ పుస్తకం దశాబ్దాల కిందట విడుదలైన అరుదైన ఎడిషన్‌ అని గుర్తించిన ముగ్గురు సోదరులు దానిని వేలం వేయాలని నిర్ణయించుకున్నారు.
ఇందుకోసం టెక్సాస్‌లోని ఓ ప్రఖ్యాత వేలం సంస్థను సంప్రదించారు. వేలం మొదలైన కొద్ది నిమిషాల్లోనే ఆసక్తికరమైన బిడ్డింగ్‌ యుద్ధం మొదలైంది. చివరికి ఆ అరుదైన కామిక్ పుస్తకం ఏకంగా 9.12 మిలియన్ డాలర్లు భారత కరెన్సీలో దాదాపు రూ.81.25 కోట్లకు అమ్ముడైంది. ఒక కామిక్ పుస్తకం ఇంత భారీ ధర పలకడం ఇదే తొలిసారి అని వేలం నిర్వాహకులు చెప్పారు.
మొత్తానికి పాత ఇంటి శుభ్రపరిచే పనిలో దొరికిన వస్తువు ఇలా ముగ్గురు సోదరుల జీవితాలను పూర్తిగా మార్చేసింది. వారికి ఇది నిజంగా అనుకోని అదృష్టం, ఒక పుస్తకం రూపంలో దొరికిన అరుదైన వరం. పాత ఇంటిలో దొరికిన ఈ చిన్న కామిక్… ఇప్పుడు ప్రపంచంలో అత్యంత ఖరీదైన కలెక్టర్ల ఐటెమ్‌ల జాబితాలోకి చేరిపోయింది. ఒక సాధారణ రోజును అసాధారణ అదృష్ట క్షణంగా మార్చిన ఈ కథ ప్రస్తుతం సోషల్ మీడియాలో అందరినీ ఆశ్చర్యపరుస్తోంది.
