పోడు భూముల్లో మళ్లీ లొల్లి

• ట్రెంచ్ పనులు ఆపాలని జేసీబీని అడ్డుకున్న గిరిజనులు
• పోడు భూముల్లో ఉద్రిక్తత వాతావరణం

కాకతీయ, పినపాక : భద్రాద్రి కొత్తగూడెం జిల్లా పినపాక మండలంలో మల్లీ పోడు భూముల లొల్లి మొదలైంది. నియోజకవర్గంలోని బోటుగూడెం గ్రామపంచాయతీ బందగిరి నగరంలో పోడు భూముల వ్యవహారం అటవీ శాఖ అధికారులు పోడుదారుల మధ్య వివాదంగా మారింది. వైయస్ రాజశేఖర్ రెడ్డి పాలన కంటే ముందు నుండే ఈ భూములను తాము సాగు చేసుకుంటున్నామని పోడు రైతులు తెలియజేస్తున్నారు. ఇప్పుడు ఆ భూముల్లో పంటలు కూడా వేశామని, అయినా ఫారెస్ట్ అధికారులు ట్రెంచ్ పేరుతో అడ్డుకున్నారని పోడుదారులు ఆరోపించారు. బీఆర్ఎస్ హయాంలో అంతరించి పోతున్న అడవులను సంరక్షించాలని అటవీశాఖలో కొత్తగా వచ్చిన అధికారులు జిల్లా అధికారుల ఆదేశాల మేరకు అటవీ భూములు అన్యాక్రాంతం కాకుండా తమ క్లస్టర్ పరిధిలో సరిహద్దులను ఏర్పాటు చేస్తున్నామని చెప్పారన్నారు. అయితే పినపాక మండల వ్యాప్తంగా చాలా చోట్ల వందలాది ఎకరాల్లో రైతు పోడు సాగు చేస్తూ జీవనం సాగిస్తున్నారు. ఈ నేపథ్యంలోనే అటవీ శాఖ అధికారులు తమ పరిధిలోని భూములు సాగు చేయొద్దని పోడుదారులను ఫారెస్ట్ అధికారులు అడ్డుకోవడంతో ఈ వివాదాలు తలెత్తుతున్నాయి.

ప్రజాప్రతినిధుల మాట బేఖాతరు..
ఇటీవల జిల్లాలో పర్యటించిన మంత్రులు పొంగులేటి శ్రీనివాసరెడ్డి, సీతక్క, పినపాక ఎమ్మెల్యే పాయం వెంకటేశ్వర్లు పోడు రైతులను ఇబ్బంది పెట్టొద్దని అటవీ అధికారులకు చెప్పారు. కానీ ఎవరూ పట్టించుకోవడం లేదని పోడుదారులు వాపోయారు. పోడు భూముల్లో నిర్వహిస్తున్న ట్రెంచ్ పనులను స్థానిక గిరిజన రైతులు అడ్డుకున్నారు. స్థానిక ఎమ్మెల్యే పాయం చెప్పిన ఆయన ఆదేశాలు పట్టించుకోకుండా పనులు చేస్తున్నారంటూ జేసీబీ ముందు గిరిజనులు పడుకున్నారు. దీంతో గిరిజన రైతులను పోడు భూముల్లోనుంచి అటవీశాఖ అధికారులు గిరిజనులను తప్పుకోవాలని చెప్పడంతో ఉద్రిక్తతకు దారితీసింది. అధికారుల తీరుతో గిరిజన రైతులు తీవ్ర ఆగ్రహం వ్యక్తం చేశారు. భూమిని వదిలే ప్రసక్తి లేదని గిరిజన రైతులు భీష్మించుకున్నారు.

పోడు రైతులకు అండగా ఉంటాం: సిపిఎం జిల్లా కమిటీ సభ్యులు నిమ్మల వెంకన్న
పోడు రైతులకు అండగా ఉంటామని సిపిఎం జిల్లా కమిటీ సభ్యులు నిమ్మల వెంకన్న అన్నారు. బుధవారం ట్రెంచ్ కొడుతున్న బండగిరి నగరం చేరుకొని అక్కడ గిరిజన సమస్యలు తెలుసుకున్నారు. అసెంబ్లీలో రైతులకు అండగా ఉంటామని, పోడు చేసుకున్న వారికి పట్టాలు ఇస్తామని ప్రభుత్వం ప్రకటిస్తే.. అధికారులు రైతుల మీద పీడీ చట్టాలతో కేసులు పెడుతున్నారని అన్నారు. సాగులో ఉన్న భూముల్లో ఈ పనులు ఏమిటని ఆయన ప్రశ్నించారు. కొత్త భూమి నరికితే అది గిరిజనులదైనా తప్పే అన్నారు. కానీ పాత భూములు ట్రంచ్ కొట్టడం ఏమిటని ప్రశ్నించారు. తక్షణమే పనులు నిలిపివేయకపోతే మరో ఉద్యమానికైనా సిద్ధమన్నారు. స్థానిక అధికారులకు అనేక సార్లు ఫిర్యాదు చేశామని అయినా ఇలా గిరిజన భూముల్లో పనులు చేయడం ఏమిటని ఆయన ప్రశ్నించారు.

ఎమ్మెల్యేతో మాట్లాడాం, సమస్యను పరిష్కరిస్తాం: కాంగ్రెస్ నాయకుడు బండారు సాంబ
పోడు రైతుల సమస్య తెలియగానే బందగిరి నగరానికి చేరుకుని, తక్షణమే పినపాక శాసనసభ్యుడు పాయం వెంకటేశ్వర్లుతో మాట్లాడామని కాంగ్రెస్ సీనియర్ నాయకుడు బండారు సాంబ తెలిపారు. గిరిజన సమస్యలపై కాంగ్రెస్ పార్టీ సానుకూలంగా ఉందని, తక్షణమే ట్రంచ్ పనులు నిలిపివేయాలని ఎమ్మెల్యే అటవీ శాఖ అధికారులకు తెలిపినట్లుగా సాంబ తెలిపారు. పూర్తిస్థాయిలో సర్వే నిర్వహించిన తర్వాత అటవీ శాఖ భూములు ఉంటే వారికి అందిస్తామని సైతం తెలిపారు. కానీ ఎంతో కాలంగా పోడు సాగు చేసుకుంటున్న భూములపై దౌర్జన్యం వద్దని అన్నారు.

ఫారెస్ట్ హద్దులు దాటి ట్రంచ్ పనులు నిర్వహించడం లేదని ఫారెస్ట్ రేంజ్ ఆఫీసర్ తేజస్విని, డీడిఆర్ఓ అరుణ తెలిపారు. బందగిరి నగరంలో ఎంతోకాలంగా సాగు చేసుకుంటున్న పోడు భూముల్లో ట్రంచ్ పనులు చేస్తున్నామన్న ప్రచారంలో వాస్తవం లేదన్నారు. గిరిజనుల ఆవేదన అర్థం చేసుకొని రెండు రోజులు ట్రంచ్ పనులు నిలిపివేస్తున్నామని తెలిపారు. జిపిఎస్ మ్యాప్ పూర్తి స్థాయిలో పరిశీలించిన తర్వాత ఫారెస్ట్ భూములను స్వాధీనం చేసుకుంటామని తెలిపారు. ఎవరి భూములు ఉద్దేశపూర్వకంగా లాక్కోవడం లేదని తెలిపారు. పర్యావరణాన్ని కాపాడుకోవడం ప్రతి ఒక్కరి హక్కు అని తెలిపారు.