దేవాదాయ శాఖ స్థలంలో లిక్కర్ మార్ట్
నవరాత్రులు జరిగే ప్రాంతంలో ఏర్పాటు
ఎలాంటి అనుమతులు లేకుండానే షెడ్డు నిర్మాణం
ఇంటి నెంబర్ రాకుండానే కరెంటు మీటర్
ప్రొహిబిషన్ ఎక్సైజ్ శాఖ అత్యుత్సాహం
మరో రెండు మూడురోజుల్లో లైసెన్స్ వచ్చే అవకాశం
ఉన్నతాధికారులకు ఫిర్యాదులందినా డోంట్ కేర్
స్థానిక కార్పొరేటర్ చెప్పిన వినిపించుకోని వైనం
కాకతీయ, ఖమ్మం ప్రతినిధి : ఖమ్మం నగరం 41వ డివిజన్ జమ్మి బండ లక్ష్మీ నరసింహ స్వామి దేవాలయ భూమిలో లిక్కర్ మార్ట్ ఏర్పాటు సర్వం సిద్ధమైంది. ప్రతి సంవత్సరం జరిగే దసరా నవరాత్రులు చివరి రోజు జరిగే పాలపిట్ట దర్శనానికి ప్రసిద్ధి చెందిన జమ్మి బండ పక్కన నిర్మాణం చేపట్టడంపై స్థానికులు అభ్యంతరం వ్యక్తం చేస్తున్నారు. లిక్కర్ మార్ట్ ఏర్పాటు కోసం ఎక్సైజ్ ప్రొహిబిషన్ శాఖ అధికారులు అనుమతులు ఇవ్వడమేంటని స్తంభాద్రి ఉత్సవ కమిటీ భక్త బృందం పలువురు ఉన్నతాధికారులకు ఫిర్యాదు చేసినట్లు సమాచారం. ఎన్నో ఏళ్ల ఖమ్మం చరిత్రకు తలమానికంగా నిలిచిన జమ్మిబండ పుణ్యక్షేత్రం పక్కన లిక్కర్ మార్ట్ నిర్మించడంపై స్థానిక కార్పొరేటర్ కర్నాటి కృష్ణ దేవాదాయ శాఖ అధికారులకు, కార్పొరేషన్ అధికారులకు ఫిర్యాదు చేశారు. అయితే ఈ లిక్కర్ మార్ట్ నిర్మాణం ప్రధాన రహదారి చేపట్టడం పక్కనే ఉన్న దేవాలయానికి ఆ పక్కన ఉన్న విద్యాసంస్థలకు ఇబ్బందిగా మారే అవకాశం ఉందని ప్రజలు వాపోతున్నారు. ఇప్పటికే నిర్మించిన షెడ్డు కు ఇంటి నెంబర్ లేకుండానే కరెంటు మీటర్ ఇవ్వడం పట్ల విద్యుత్ శాఖ అధికారులపై కూడా అనుమానాలు రేకెత్తుతున్నాయి.
అధికారం అండదండలు ఉంటే అంతేనా..?!
కార్పొరేషన్ నుంచి తీసుకోవాల్సిన ఎలాంటి అనుమతులు తీసుకోకపోగా, చకచకా పనులు జరగడం వెనక అధికార పార్టీకి చెందిన కీలక నేత ఉన్నట్లు ఆరోపణలు వినబడుతున్నాయి. అధికారం ఉంటే ఏదైనా చేయడం సులభతరమని ఈ లిక్కర్ మార్ట్ నిర్మాణం వ్యవహారమే స్పష్టం చేస్తోందని ప్రజలు మండిపడుతున్నారు. మరో రెండు మూడు రోజుల్లో ఎక్సైజ్ ప్రొహిబిషన్ శాఖ నుంచి లైసెన్స్ కూడా ఇవ్వనున్నట్లు తెలుస్తోంది. స్థానిక కార్పొరేటర్ చెప్పిన వినిపించుకోకుండా తమతైన శైలిలో లిక్కర్ మార్ట్ యజమాని కొంతమంది స్థానిక నేతల సహకారంతో ఈ నిర్మాణం చేపడుతున్నట్లు విమర్శలు వెలువెత్తుతున్నాయి. జమ్మి బండకు ఆనుకుని ఉన్న స్థలం ఓ ప్రైవేటు వ్యక్తిదని తప్పుడు ప్రచారం చేస్తూ కోర్టు పరిధిలో ఉన్న స్థలంలో నిర్మాణం చేపట్టడం వెనక అనుమానాలు కూడా వ్యక్తమవుతుండటం గమానార్హం.
