ఖమ్మంలో జాబ్ మేళా.. 100 ఉద్యోగాలకు అవకాశం
పేటీఎం సేల్స్ & సర్వీస్లో ఖాళీల భర్తీ
ఈనెల 19న మోడల్ కెరీర్ సెంటర్లో నిర్వహణ
కాకతీయ, ఖమ్మం: జిల్లాలోని నిరుద్యోగ యువతకు ఉపాధి అవకాశాలు కల్పించేందుకు ఈనెల 19న జాబ్ మేళా నిర్వహించనున్నట్లు జిల్లా ఉపాధికల్పన అధికారి కొండపల్లి శ్రీరామ్ తెలిపారు. ఖమ్మంలోని మోడల్ కెరీర్ సెంటర్ (ప్రభుత్వ ఐటీఐ, టేకులపల్లి) ప్రాంగణంలో గురువారం ఉదయం 10 గంటలకు ఈ జాబ్ మేళా జరగనుంది. ప్రైవేట్ రంగానికి చెందిన పేటీఎం సేల్స్ & సర్వీస్ సంస్థలో 100 ఉద్యోగ ఖాళీల భర్తీకి ఈ మేళాను నిర్వహిస్తున్నట్లు వెల్లడించారు. సేల్స్ అండ్ సర్వీస్ విభాగంలో పనిచేసేందుకు 20 నుంచి 40 సంవత్సరాల మధ్య వయస్సు కలిగి, ఎస్ఎస్సీ, ఇంటర్ లేదా డిగ్రీ అర్హత ఉన్న అభ్యర్థులు హాజరుకావచ్చని తెలిపారు. ఎంపికైన వారికి నెలకు రూ.15 వేల నుంచి రూ.18 వేల వరకు వేతనం అందిస్తారని పేర్కొన్నారు. ఆసక్తి, అర్హత గల అభ్యర్థులు తమ విద్యార్హతల ధృవపత్రాల జిరాక్స్ కాపీలతో హాజరుకావాలని సూచించారు. మరిన్ని వివరాల కోసం 8185863275, 9866771213 నంబర్లను సంప్రదించాలని తెలిపారు.
