వైరా పీఠం డాక్టర్ చంద్రకళకు…
కాంగ్రెస్ అధిష్టానం కీలక నిర్ణయం
కాంగ్రెస్ తరఫున 6వ వార్డు కౌన్సిలర్ డాక్టర్ కాపా చంద్రకళ ఎన్నిక
మున్సిపాలిటీలో కాంగ్రెస్కు స్పష్టమైన మెజారిటీ ఆధిక్యం
చైర్పర్సన్ రేసులో తీవ్ర పోటీకి తెరదించిన అధిష్టానం
20 వార్డుల్లో కాంగ్రెస్కు 12, బీఆర్ఎస్ 5, ఇతరులకు 3 స్థానాలు
నేడు కౌన్సిలర్ల ప్రమాణ స్వీకారం, అనంతరం ఎన్నిక ప్రక్రియ
వైస్ చైర్మన్ ఎంపికపై కూడా పార్టీ కసరత్తు పూర్తి
కాకతీయ, ఖమ్మం ప్రతినిధి : ఖమ్మం జిల్లా వైరా మున్సిపాలిటీ చైర్పర్సన్ పదవిని కాంగ్రెస్ పార్టీ ఖాతాలోకి తీసుకెళ్లే దిశగా కీలక నిర్ణయం తీసుకుంది. వైరా మున్సిపాలిటీలో 6వ వార్డు నుంచి కాంగ్రెస్ తరఫున విజయం సాధించిన డాక్టర్ కాపా చంద్రకళను మున్సిపల్ చైర్పర్సన్గా కాంగ్రెస్ అధిష్టానం ఖరారు చేసినట్లు పార్టీ వర్గాలు వెల్లడించాయి. దీంతో వైరా మున్సిపల్ పీఠం కాంగ్రెస్కు దక్కడం ఖాయమైంది. ఇటీవల వెలువడిన మున్సిపల్ ఎన్నికల ఫలితాల్లో వైరా మున్సిపాలిటీలో మొత్తం 20 వార్డులకు గాను కాంగ్రెస్ పార్టీ 12 స్థానాలు గెలుచుకుని స్పష్టమైన మెజారిటీ సాధించింది. బీఆర్ఎస్ పార్టీ 5 వార్డుల్లో విజయం సాధించగా, మిగిలిన 3 స్థానాలను ఇండిపెండెంట్, సీపీఎం అభ్యర్థులు గెలుచుకున్నారు. దీంతో చైర్పర్సన్ ఎన్నిక కాంగ్రెస్కు లాంఛనప్రాయంగా మారింది.
తీవ్ర పోటీకి తెరదించిన అధిష్టానం
చైర్పర్సన్ పదవి కోసం కాంగ్రెస్ పార్టీలో పలువురు ఆశావహులు పోటీ పడినప్పటికీ, పార్టీ అధిష్టానం చివరకు డాక్టర్ కాపా చంద్రకళ పేరును ఖరారు చేసింది. స్థానిక రాజకీయ సమీకరణాలు, సామాజిక సమతుల్యత, పార్టీకి చేసిన సేవలను పరిగణనలోకి తీసుకుని ఈ నిర్ణయం తీసుకున్నట్లు సమాచారం. అలాగే వైస్ చైర్మన్ ఎంపికపై కూడా పార్టీ నేతలు కసరత్తు పూర్తి చేసినట్లు తెలిసింది. కొత్తగా ఎన్నికైన కౌన్సిలర్ల ప్రమాణ స్వీకారం మరియు చైర్పర్సన్, వైస్ చైర్మన్ అధికారిక ఎన్నిక ప్రక్రియ నేడు (ఫిబ్రవరి 16, 2026) జరగనుంది. ప్రమాణ స్వీకారం అనంతరం నిర్వహించే ప్రత్యేక సమావేశంలో చైర్పర్సన్ ఎన్నికను అధికారికంగా పూర్తి చేయనున్నారు. కాంగ్రెస్కు స్పష్టమైన మెజారిటీ ఉండటంతో వైరా మున్సిపల్ పీఠం ఆ పార్టీ ఖాతాలో చేరడం ఖాయంగా కనిపిస్తోంది.
