కాకతీయ, తెలంగాణ బ్యూరో: నిజామాబాద్ జిల్లాలోని ఆలూరు మండల కేంద్రంలో మద్యం మత్తులో ఘోర ఘటన చోటుచేసుకుంది. స్థానికులు చెబుతున్న వివరాల ప్రకారం, బంజ్ జాన్ అనే యువకుడు మద్యం సేవించి రోడ్లపై అల్లరి చేస్తూ ప్రజలను ఇబ్బందులకు గురి చేశాడు. కొంతసేపటికి అక్కడికి వచ్చిన ఆర్టీసీ బస్సుపై బీర్ బాటిల్‌తో దాడి చేశాడు. బాటిల్‌ను బస్సు అద్దాలపై విసిరి పగులగొట్టడంతో ప్రయాణికులు భయాందోళనకు గురయ్యారు.
ఈ సమయంలో బస్సులో మహిళలు, చిన్న పిల్లలు కూడా ఉన్నారని, ఒక్కసారిగా బాటిల్ పగలడంతో వారు గందరగోళానికి గురయ్యారని ప్రత్యక్ష సాక్షులు తెలిపారు. అంతేకాకుండా, యువకుడు పోలీసుల సమక్షంలోనే అసభ్యకర ప్రవర్తన ప్రదర్శించి, అక్కడున్న మహిళలను అవమానపరిచే రీతిలో ప్రవర్తించినట్లు సమాచారం.
ఘటనపై స్థానికులు తీవ్ర ఆగ్రహం వ్యక్తం చేశారు. వెంటనే సమాచారం అందుకున్న ఆలూరు పోలీసులు సంఘటనా స్థలానికి చేరుకుని నిందితుడిని అదుపులోకి తీసుకున్నారు. బస్సుకు జరిగిన నష్టం, ప్రయాణికుల వాంగ్మూలాల ఆధారంగా కేసు నమోదు చేసి విచారణ ప్రారంభించారు.
పోలీసుల ప్రకారం.. బంజ్ జాన్ మద్యం మత్తులో పూర్తిగా అదుపు తప్పి ఈ ఘటనకు పాల్పడినట్లు తెలుస్తోంది. అయితే, అతని ప్రవర్తన ప్రజా ప్రదేశంలో హానికరంగా ఉండడంతోపాటు మహిళల గౌరవాన్ని దెబ్బతీసేలా ఉందని పోలీసులు తెలిపారు. నిందితుడిపై మద్యం మత్తులో ప్రజా ప్రదేశంలో హింసాత్మక ప్రవర్తన, ప్రభుత్వ ఆస్తి ధ్వంసం, మహిళల పట్ల అసభ్య ప్రవర్తన వంటి పలు సెక్షన్ల కింద కేసులు నమోదు చేశారు.
స్థానికులు ఇలాంటి సంఘటనలు మళ్లీ జరగకుండా పోలీసు పహారా పెంచాలని కోరుతున్నారు. ఆలూరు గ్రామంలో ఈ ఘటన పెద్ద కలకలం రేపింది. మహిళలు, ప్రయాణికులు భద్రతపై ఆందోళన వ్యక్తం చేస్తున్నారు.
