గ్రామ సర్పంచ్ నుంచి జిల్లా దిశ కమిటీ వరకూ
హేమలతకు గౌరవ కిరీటం
పోలంపల్లి సర్పంచ్కు జిల్లా స్థాయి గుర్తింపు
అభివృద్ధి, పారదర్శకతే ఎంపికకు బాట
కాకతీయ, కారేపల్లి: పోలంపల్లి సర్పంచ్ హేమలత బాలాజీ నాయక్ జిల్లా ‘దిశ’ కమిటీ సభ్యురాలిగా ఎంపికయ్యారు. సాధారణ గ్రామ సర్పంచ్గా ప్రారంభమైన ఆమె ప్రజాసేవ ప్రస్థానం జిల్లా స్థాయి నిర్ణయాత్మక వేదిక వరకూ చేరడం విశేషంగా మారింది. గ్రామీణాభివృద్ధిపై చూపిన అంకితభావం, నిరంతర కృషికి గుర్తింపుగా ఈ అవకాశం లభించిందని స్థానికులు పేర్కొంటున్నారు. స్థానిక సంస్థల ఎన్నికల్లో గెలుపొందినప్పటి నుంచి పోలంపల్లి అభివృద్ధే లక్ష్యంగా ఆమె పనిచేస్తున్నారు. ప్రతి ఇంటికీ తాగునీటి సౌకర్యం కల్పించడం, సిమెంట్ రహదారుల నిర్మాణం ద్వారా గ్రామాలను కలపడం, ప్రభుత్వ పథకాలను అర్హులైన లబ్ధిదారులకు పారదర్శకంగా అందించడం వంటి కార్యక్రమాలు చేపట్టారు. ప్రజల సమస్యలను నేరుగా తెలుసుకుని తక్షణ పరిష్కారం చూపడం ఆమె ప్రత్యేకతగా నిలిచింది. “ఈ గౌరవం నా ఒక్కదానికే కాదు, పోలంపల్లి ప్రజలందరికీ దక్కింది. జిల్లా స్థాయిలో మన గ్రామ సమస్యలను వినిపించే అవకాశం రావడం ఆనందంగా ఉంది” అని హేమలత తెలిపారు. ఈ నియామకంతో గ్రామానికి మరిన్ని నిధులు, అభివృద్ధి పథకాలు అందుతాయని గ్రామస్తులు ఆశాభావం వ్యక్తం చేస్తున్నారు.
