సీపీఐతోనే గ్రామీణ అభివృద్ధి సాధ్యం
కొత్తగూడెం ఎమ్మెల్యే కూనంనేని
కాకతీయ, కొత్తగూడెం రూరల్ : కమ్యూనిస్టు పార్టీ రాష్ట్ర కార్యదర్శి, కొత్తగూడెం శాసనసభ సభ్యుడు కూనంనేని సాంబశివరావు గ్రామీణ అభివృద్ధి, సమస్యల పరిష్కారం సిపిఐ ప్రతినిధుల ద్వారా మాత్రమే సాధ్యమని అన్నారు. గ్రామపంచాయతీ ఎన్నికల ప్రచారంలో భాగంగా, సోమవారం ఆయన లక్ష్మీదేవిపల్లి మండలంలోని అశోక్ నగర్ కాలనీ, శ్రీనగర్ కాలనీ, సీతారాంపురం, వేపలగడ్డ, లాలుతండా, రేగళ్ల గ్రామ పంచాయతీలను విస్తృతంగా పర్యటించారు. గ్రామ సెంటర్లలో జరిగిన సమావేశాల్లో కూనంనేని, గతంలో మండలంలోని ప్రజా సమస్యలను గుర్తించి, రోడ్లు, డ్రైన్లు, అంగన్వాడీలు, పంచాయతీ భవనాల నిర్మాణాలను పూర్తి చేసినట్టు తెలిపారు. అలాగే, మరికొన్ని అభివృద్ధి ప్రతిపాదనలను అధికారులకు అందించినట్లు చెప్పారు. ఓట్ల కోసం కొందరు వ్యక్తులు ప్రజలను తప్పుదోవ పట్టించాలనుకుంటున్నారని, వీరి మాటల్లో రాజకీయ పరిపక్వత లేదని కూనంనేని సూచించారు. మండలంలో మంజూరు చేసిన అభివృద్ధి నిధులు వ్యక్తిగత సొత్తు కాదని, ఇవి ప్రజల సంక్షేమానికి మాత్రమే ఉపయోగించబడతాయని ఆయన గుర్తు చేశారు. కూనంనేని, రెండో దఫా గ్రామపంచాయతీ ఎన్నికల్లో సిపిఐకి ప్రాధాన్యం ఇవ్వబడిన విషయం, నియోజకవర్గ అభివృద్ధికి నిదర్శనమని చెప్పారు. మూడో దఫా లక్ష్మీదేవిపల్లి, సుజాతనగర్ మండలాల్లో జరిగే గ్రామపంచాయతీ ఎన్నికల్లో సిపిఐ అభ్యర్థులను గెలిపించి మరింత అభివృద్ధికి ప్రోత్సహించాలని ప్రజలను ఆహ్వానించారు. కార్యక్రమంలో చంద్రగిరి శ్రీనివాసరావు, దీటి లక్ష్మిపతి, దారా శ్రీనివాస్, నూనావత్ గోవిందు, సపావట్ రవి, పరుపర్తి రాజు, కంటెం సత్యనారాయణ, శేఖర్, రాంబాబు తదితర నాయకులు పాల్గొన్నారు.
