కోతి చేసిన పనికి కోట్ల నష్టం

కోతి చేసిన పనికి కోట్ల నష్టం
కొండగట్టు అగ్ని ప్రమాదంలో 30 షాపులు ద‌గ్గం
కళ్ల ముందే బూడిద పాలైన దుకాణాలు
వీధిన పడిన కుటుంబాలు.. మేడారం జాతర నేపథ్యంలో వ్యాపారుల‌ భారీ పెట్టుబడులు
అలస్యంగా అందుకున్న అగ్నిమాపక సేవలు
కాకతీయ గ్రౌండ్ రిపోర్ట్

కాక‌తీయ‌, క‌రీంన‌గ‌ర్ బ్యూరో : కోతి చేసిన పని.. కోట్ల నష్టాన్ని మిగిల్చింది. కొండ‌గ‌ట్టులో శ‌నివారం రాత్రి జ‌రిగిన అగ్ని ప్ర‌మాదంలో 30 కుటుంబాలు జీవ‌నాధారాన్ని కోల్పోయి రోడ్డున ప‌డ్డాయి. జగిత్యాల జిల్లా మల్యాల మండలం కొండగట్టు గ్రామంలో శ‌నివారం రాత్రి జ‌రిగిన అగ్ని ప్ర‌మాదంలో వ్యాపారులు భారీగా న‌ష్ట‌పోయారు. ఆభంయాజనేయ స్వామి బొమ్మల వీధిలో జరిగిన అగ్ని ప్రమాదంలో సుమారు 30 షాపులు పూర్తిగా బూడిద అవగా 2 కోట్ల పైగా ఆస్తి నష్టం వాటిల్లినట్లుగా తెలుస్తోంది.

బొమ్మల వారీ వీధిలోని అభయాంజనేయ స్వామి దేవాలయం సమీపంలోని ఒక బొమ్మల షాపుపై ఉన్న రేకులపై కొతి ఎగిరి గంతులు వేయడంతో ఆ రేకులపై ఉన్న కరెంట్ సర్వీస్ వైర్ తెగి షార్ట్ సర్క్యూట్ జరిగింది. ఈ ఘటనలో అక్కడ ఉన్న బొమ్మల షాపులో మంటలు చెలరేగగా సుమారు గంట వ్యవధిలోనే క్రమేపి మంటలు విస్తరించాయి. బొమ్మల షాపులు, దేవుడి చిత్రపటాల షాపులు, గాజుల షాపులు, బ్యాగుల షాపులు మొత్తం 30 షాపులు బూడిదపాలయ్యాయి. క్ష‌ణాల్లో మంట‌లు వ్యాపించ‌డంతో నిద్ర నుంచి లేచి మేల్కోనేలోపే షాపుల‌న్నీ కాలి బూడిద‌య్యాయి. లక్షల రూపాయల సామగ్రి కళ్ల ముందే కాలిపోతున్న నిస్సహాయ స్థితిలో చూస్తూ ఉండిపోయారు. కళ్ల ముందే బూడిదపాలవుతున్నా తాము ఏమి చేయలేని నిస్సహాయ స్థితిలో ఉండిపోయామని గుండెలు బాధుకుంటూ వెల్ల‌డించారు. బొమ్మ‌ల వ్యాపారం చేసుకుంటున్న వారంతా కూడా మంచిర్యాల, కాగజ్‌నగర్, ఆదిలాబాద్, కరీంనగర్ మరియు మరికొన్ని ప్రాంతాల నుంచి బతుకుదెరువు కోసం కొండగట్టుకు వలస వ‌చ్చి జీవిస్తున్నారు. ఈ ప్రమాదంలో బాధిత కుటుంబాల ఇళ్లలోని నిత్యవసర సామగ్రి, బట్టలు, నగదు, బంగారం, విద్యార్హతల సర్టిఫికెట్లు పూర్తిగా అగ్నికి ఆహుతయ్యాయి.

మేడారం నేప‌థ్యంలో భారీగా పెట్టుబ‌డులు

ములుగు జిల్లా తాడ్వాయి మండలం మేడారం గ్రామంలో జనవరి నెలలో జరిగే సమ్మక్క–సారక్క వనదేవతల జాతర సందర్భంగా భక్తులు అధిక సంఖ్యలో వేములవాడ, కొండగట్టుకు వచ్చి దర్శనాలు చేసుకోవ‌డం ఆన‌వాయితీగా భావిస్తారు. ఈనేప‌థ్యంలోనే ఇక్కడి నుంచి వనదేవతల దర్శనాలకు వెళ్తారు. అయితే ఈ సమయమే తమ వ్యాపార కాలం కావడంతో అగ్ని ప్రమాద వ్యాపార బాధితులందరూ భారీగా పెట్టుబడులు పెట్టి వ్యాపారానికి అవసరం అయ్యే సామగ్రిని, వస్తువులను నిల్వ చేసి ఉంచుకున్నారు. ఆకస్మాత్తుగా జరిగిన షార్ట్ సర్క్యూట్‌తో కూడిన అగ్ని ప్రమాదం వల్ల పెట్టిన పెట్టుబడులు మొత్తం అగ్నికి ఆహుతయ్యి బూడిదపాలైంద‌ని బాధితులు రోధించారు.

అలస్యంగా అందుకున్న అగ్నిమాపక సేవలు

రాత్రి 10.30 నిమిషాల సమయంలో అగ్ని ప్రమాదం చోటు చేసుకోగా వెంటనే స‌మాచారాన్ని అందించినా అగ్నిమాపక శాఖ అధికారులు గంటన్నర ఆల‌స్యంగా చేరుకున్నార‌ని బాధితులు వెల్ల‌డిస్తున్నారు. అగ్నిమాపక శాఖ వేగంగా స్పందించి ఉండి ఉంటే తమకు ఇంతటి నష్టం వాటిల్లేది కాదని తెలిపారు. జగిత్యాల నుంచి మల్యాల చౌరస్తా వరకూ సుమారు 15 వరకు వైట్ లైన్ స్పీడ్ బ్రేకర్లు ఉన్నాయి. అయితే అదే మార్గం గుండా వస్తున్న ఫైర్ ఇంజన్ వాహనం వైట్ లైన్ స్పీడ్ బ్రేకర్ల కారణంగా ఫైర్ ఇంజన్ వాహనంలో గేర్ బాక్స్ లో సమస్య రావడంతో ఫైర్ ఇంజన్ వాహనం మల్యాల ఎక్స్ రోడ్ సమీపంలో రోడ్డుపైనే నిలిచిపోయింది. ఈ సమస్య కారణంగా కరీంనగర్, ధర్మాపురి, చోప్పదండి నుండి ఫైర్ ఇంజన్ వాహనాలు ఘటన స్థలానికి చేరుకొని మంటలను ఆర్పే ప్రయత్నాలు చేపట్టాయి.

నిద్ర‌పోయి ఉన్నాం
: పల్లెర్ల స్వప్న, గాజుల షాపు నిర్వాహకురాలు

నిద్రపోయి ఉన్నాము. మంటల వేడి తగులుతుండడంతో లేచి బయటకి పరిగులు తీశాం. అప్పటికే మంటలు భారీగా వ్యాపించాయి. ఫైర్ ఇంజిన్‌కు ఫోన్ చేస్తే 2 గంటల తరువాత వచ్చింది. కట్టు బట్టలతో మిగిలిపోయాము. మాకు ఇప్పుడు ఏం చేయాలో ఏమి తెలియడం లేదు.