ఎగ్జిబిషన్ ని తిలకించిన స్మార్ట్ కిడ్జ్ చిన్నారులు
కాకతీయ, ఖమ్మం : స్థానిక స్మార్ట్ కిడ్జ్ పాఠశాల చిన్నారులు నగరంలోని ఎన్ఎస్పీ కాలనీలో ఉన్న డీబీఆర్సీ భవన్ లో ఏర్పాటు చేసిన ఫిలా టెలి ఎగ్జిబిషన్ ను శుక్రవారం తిలకించారు. ఎగ్జిబిషన్లో ఏర్పాటు చేసిన ప్రాచీన పోస్టల్ స్టాంప్ ల సేకరణను, ప్రాచీన నాణేలు, ప్రస్తుత నాణేలను విద్యార్థులు ఆసక్తిగా గమనించారు. పోస్ట్ కార్డులను, ఎన్వలప్ కవర్లను పరిశీలించారు. అనతి కాలం నుంచి మొదలుకొని ఇప్పటివరకు అందుబాటులో ఉన్న పోస్టల్ స్టాంపులు, నాణేలను తిలకించి వాటి వివరాలను సేకరించారు. ఈ సందర్భంగా స్మార్ట్ కిడ్జ్ పాఠశాల కరస్పాండెంట్ చింతనిప్పు కృష్ణ చైతన్య మాట్లాడుతూ పోస్టల్ శాఖ అందుబాటులో ఉంచిన పోస్టల్ స్టాంప్ లతో పాటు పలు దేశాల పోస్టల్ స్టాంప్ లు, ప్రాచీన కాలంలో వాడిన నాణేలను ఎగ్జిబిషన్లో ఏర్పాటు చేయడం ద్వారా విద్యార్థులు వాటి వివరాలను తెలుసుకునే అవకాశం ఏర్పడింది అని తెలిపారు. ఇటువంటి ఎగ్జిబిషన్లను వివిధ అంశాలపై ఏర్పాటు చేస్తే పలు అంశాలపై విద్యార్థులకు ప్రయోజనకరం, వివరాల పట్ల అవగాహన పెంచుకోగలుగుతారని తెలిపారు. ఈ కార్యక్రమంలో పాఠశాల డైరెక్టర్ చింతనిప్పు సుకన్య, ప్రిన్సిపల్,విద్యార్థులు తదితరులు పాల్గొన్నారు.


