ఖమ్మం జిల్లా కలెక్టరేట్ వద్ద ఉద్రిక్తత
స్వామినేని రామారావు హత్య నిందితులను అరెస్టు చేయాలంటూ సిపిఎం ధర్నా
కలెక్టర్ ను కలిసేందుకు ప్రయత్నం లో కార్యకర్తలకు పోలీసుల మధ్య తోపులాట
కాకతీయ, ఖమ్మం ప్రతినిధి: ఖమ్మం జిల్లా కలెక్టరేట్ వద్ద ఉద్రిక్తత వాతావరణం చోటు చేసుకుంది. సిపిఎం పార్టీ రాష్ట్ర నాయకులు సామినేని రామారావు హత్య కేసు చేదించడంలో పోలీసులు విఫలం చెందారని గత నాలుగు రోజులుగా ఆ పార్టీ చేపడుతున్న నిరసన కార్యక్రమం లో భాగంగా ఈరోజు కలెక్టర్ కార్యాలయాన్ని ముట్టడించడం జరిగింది. హత్య కేసు నిందితులను అరెస్టు చేయాలని వారు నినాదాలు చేశారు. ఈ క్రమంలో పార్టీ నాయకులు కార్యకర్తలు పెద్ద ఎత్తున కలెక్టరేట్ వద్దకు చేరుకొని కలెక్టర్ ను కలిసే క్రమంలో కార్యకర్తలకు పోలీసులకు మధ్య తోపులాట కొనసాగింది. పోలీసులు నిరసనకారులను కార్యాలయం లోకి రానివ్వకుండా అడ్డుకొని ముఖ్య నాయకులను అరెస్టు చేసి పోలీసు వాహనాల్లో వివిధ స్టేషనులకు తరలించారు.
