హుజురాబాద్ పట్టణ సుందరీకరణకు మరిన్ని నిధులు కేటాయిస్తాం
కాంగ్రెస్ పార్టీ నియోజకవర్గ ఇంచార్జి వొడితల ప్రణవ్
కాకతీయ,హుజురాబాద్: హుజురాబాద్ పట్టణానికి ఆనుకొని ఉన్న మోడల్ చెరువు సుందరీకరణలో భాగంగా జరుగుతున్న వాకింగ్ ట్రాక్, చిల్డ్రన్ పార్క్ నిర్మాణ పనులను గురువారం కాంగ్రెస్ పార్టీ నియోజకవర్గ ఇంచార్జి వొడితల ప్రణవ్ పరిశీలించారు. ఈ సందర్భంగా ఆయన మాట్లాడుతూ.పనులన్నీ నాణ్యతతో పూర్తి చేయాలని సంబంధిత అధికారులకు సూచనలు ఇచ్చారు.విశాల విస్తీర్ణం ఉన్న ఈ చెరువు ఎన్నో సంవత్సరాలుగా అభివృద్ధి వైపునకు తిరస్కరించబడిందని ప్రణవ్ విమర్శించారు.గొప్పగా పరిపాలించామని చెప్పుకున్న గత పాలకులు చెరువు పరిసరాల్లో ఉన్న పిచ్చిమొక్కలు, మురికి తొలగించడానికి కూడా ముందుకు రాలేదేంటి? అని ప్రశ్నించారు.కాంగ్రెస్ ప్రభుత్వం అధికారంలోకి వచ్చిన వెంటనే హుజురాబాద్ పట్టణ అభివృద్ధి కోసం 15 కోట్లు మంజూరు చేసిందని, అందులో భాగంగా పిల్లల కోసం చిల్డ్రన్ పార్క్, ప్రజల కోసం వాకింగ్ ట్రాక్ వంటి సదుపాయాలు ఏర్పాటు చేస్తున్నామని వివరించారు. మోడల్ చెరువుతో పాటు గంగోనికుంటను కూడా అభివృద్ధి చేస్తామని, హుజురాబాద్ పట్టణాన్ని ఆదర్శంగా తీర్చిదిద్దడమే లక్ష్యమని తెలిపారు.గత పాలకులకు అభివృద్ధి మీద కన్నా బురదచల్లే రాజకీయాల మీదే ఎక్కువ శ్రద్ధ ఉండేది. మేమైతే ప్రజల అవసరాలను దృష్టిలో పెట్టుకుని పనులు చేస్తాం అని ప్రణవ్ అన్నారు.ఈ సందర్శన కార్యక్రమంలో హుజురాబాద్ కమిషనర్ సమ్మయ్య, కాంగ్రెస్ నాయకులు, కార్యకర్తలు అధిక సంఖ్యలో పాల్గొన్నారు.
