గంజాయి సేవిస్తున్న ఇద్దరి అరెస్టు
కాకతీయ, కరీంనగర్ : గంజాయి కేసులో తిమ్మాపూర్ పోలీసులు ఇద్ద‌రిని అరెస్టు చేశారు.ఈ సంఘ‌ట‌న ఆదివారం ఉద‌యం జ‌రిగింది. తిమ్మ‌పూర్‌లోని తిరుమల హోమ్స్‌ ఏరియాలో మత్తు పదార్థాల రవాణా జరుగుతున్నట్లు సమాచారం అందుకున్న పోలీసులు దాడి నిర్వహించారు. దాడిలో ఇద్దరు యువకులు అదుపులోకి తీసుకున్నారు, ఒకరు పోలీసులు చూసి పరారయ్యారు. పోలీసులు పట్టుబడ్డ యువకుల వద్ద మొత్తం 110 గ్రాముల గంజాయి లభించినట్లు ఎస్సై తెలిపారు. పరారైన వ్యక్తి అక్కడే కేటీఎమ్ బైక్, గంజాయి తాగే బాంగ్ డబ్బా వదిలేసి పారిపోయాడు. అరెస్టయినవారిలో కొరండ్ల రఘు వర్ధన్ రెడ్డి, చింతకింది శ్రీ కృష్ణ ఉన్నారు. రఘు వర్ధన్ రెడ్డి లారీ డ్రైవర్‌గా పనిచేస్తూ తిరుమల హోమ్స్‌లో గది అద్దెకు తీసుకొని శ్రీ కృష్ణతో క‌లిసి నివసిస్తున్నాడు. శ్రీ కృష్ణ తిమ్మాపూర్‌లోని ఇంజనీరింగ్ కళాశాలలో బీటెక్ రెండో సంవత్సరం చదువుతున్నాడు. ఇద్దరూ కొంతకాలంగా తిమ్మాపూర్‌లోని ఒక ప్రైవేట్ హాస్టల్‌లో ఉండే వ్యక్తి దగ్గరి నుంచి గంజాయి కొనుగోలు చేసి వినియోగిస్తున్న‌ట్లుగా పోలీసులు గుర్తించారు. ఈ కేసులో గంజాయి సరఫరా చేసిన వ్యక్తి పరారీలో ఉన్నారు. పోలీసులు 110 గ్రాముల గంజాయి, రెండు బాంగ్ డబ్బాలు, బైక్, ఒక మొబైల్ ఫోన్ స్వాధీనం చేసుకుని కేసు నమోదు చేశారు. విద్యార్థులపై హాస్టల్ యాజమాన్యం కఠినంగా నిఘా ఉంచాలని పోలీసులు సూచించారు.నిర్లక్ష్యం ప్రదర్శిస్తే కఠిన చర్యలు తీసుకుంటామని హెచ్చరించారు.
