వీడిన సస్పెన్స్.. అతి త్వరలోనే స్మృతి, పలాశ్ వివాహం!
స్మృతి–పలాశ్ వివాహం వాయిదాపై రూమర్ల తుఫాన్
అభిమానుల్లో రోజురోజుకు పెరుగుతున్న టెన్షన్
గుడ్న్యూస్ పంచుకున్న పలాశ్ తల్లి అమిత ముచ్చల్
కాకతీయ, స్పోర్ట్స్ : భారత మహిళా క్రికెట్లో ఆధిపత్యం చాటుతున్న స్టార్ బ్యాటర్ స్మృతి మంధాన, బాలీవుడ్ మ్యూజిక్ డైరెక్టర్ పలాశ్ ముచ్చల్ వివాహంపై నెలకొన్న సస్పెన్స్ ఇప్పుడు వీడినట్లే కనిపిస్తోంది. ఎన్నో రూమర్లు, అనుమానాలు, సోషల్ మీడియాలో వైరల్ అయిన స్క్రీన్షాట్లు.. ఈ అన్నింటి మధ్య ఇరు కుటుంబాలు ఇచ్చిన తాజా సంకేతాలు అభిమానుల్లో కొత్త ఆశను నింపుతున్నాయి.
నవంబర్ 23న జరగాల్సిన స్మృతి, పలాశ్ల పెళ్లి వేడుక చివరి క్షణాల్లోనే వాయిదా పడటం అందరిని ఆశ్చర్యపరిచింది. వివాహ దినాన స్మృతి తండ్రి శ్రీనివాస్ మంధాన గుండెపోటు లక్షణాలతో అస్వస్థతకు గురికావడం, వెంటనే ఆసుపత్రిలో చేరవలసి రావడం.. ఈ పరిస్థితుల్లో పెళ్లి జరగటం అసాధ్యం కావడంతో నిరవధిక వాయిదా ప్రకటించాల్సి వచ్చింది. కుటుంబానికి ఇది ఆ రోజు అతి పెద్ద షాక్.
అయితే ఇక్కడితో కథ ముగియలేదు. ఆ వెంటనే వరుడు పలాశ్ ముచ్చల్ కూడా ఆరోగ్య సమస్యలతో ఆసుపత్రిలో చేరడం మరో ఆందోళన కలిగించింది. ఒత్తిడి, యాంగ్జైటీ కారణంగా ఆయన అనారోగ్యానికి గురైనట్లు వైద్యులు తెలిపారు. ఆక్సిజన్ థెరపీతో పాటు పూర్తి విశ్రాంతి అవసరమని స్పష్టం చేశారు. ఇదే సమయంలో సోషల్ మీడియాలో స్మృతిని కించపరిస్తూ పలాశ్ మరో మహిళతో చాట్ చేసిన స్క్రీన్షాట్లు వైరల్ అవ్వడం, స్మృతి తన పెళ్లి ఫోటోల్ని డిలీట్ చేయడం.. వివాహం రద్దయిందనే పుకార్లకు బలం చేకూర్చింది.
అయితే తాజాగా రూమర్లకు పలాశ్ తల్లి అమిత ముచ్చల్ చెక్ పెట్టే ప్రయత్నం చేశారు. ఆమె ఒక ఆంగ్ల పత్రికతో మాట్లాడుతూ, “స్మృతి మంధాన, పలాశ్ ముచ్చల్ ఇద్దరూ కష్టాల్లో ఉన్నారు. పలాశ్ తన కలలను సాకారం చేసుకొని, స్మృతిని అర్ధాంగిగా ఇంటికి తీసుకురావాలని కోరుకున్నాడు. వారికి ప్రత్యేకంగా స్వాగతం పలికేందుకు నేను కూడా ఏర్పాట్లు చేసుకున్నాను. ఇప్పుడంతా బాగానే ఉంది… పరిస్థితులు సద్దుమణిగాయి. స్మృతి–పలాశ్ వివాహం అతి త్వరలోనే జరుగుతుంది” అని స్పష్టతనిచ్చారు. స్మృతి వైపు నుంచి అధికారిక ప్రకటన రాలేనప్పటికీ, ఇరు కుటుంబాల నుంచి వస్తున్న పాజిటివ్ సంకేతాలు పెళ్లి మళ్లీ ట్రాక్లోకి వచ్చినట్లు సూచిస్తున్నాయి.
