చిన్న సినిమాల దూకుడు..

చిన్న సినిమాల దూకుడు..
కంటెంట్‌తో బాక్సాఫీస్‌పై దాడి
మార్చి చివరి వారం చిన్న చిత్రాల సందడి
‘బ్యాండ్ మేళం’తో యూత్ ఫుల్ ఎంటర్‌టైన్మెంట్
సైకలాజికల్ థ్రిల్లర్‌గా ‘సుయోధన’
కామెడీ క్రికెట్ బ్యాక్‌డ్రాప్‌లో ‘G.O.A.T’
తమిళ హిట్ ‘యూత్’ తెలుగు డబ్బింగ్ రిలీజ్
జీవీ ప్రకాష్ ‘హ్యాపీ రాజ్’పై ఆసక్తి
ఓటీటీలోనూ కొత్త కంటెంట్ల వ‌రుస‌

కాకతీయ,సినిమా : కంటెంట్ బలంగా ఉంటే స్టార్ అవసరం లేదని మరోసారి నిరూపించేందుకు చిన్న సినిమాలు సిద్ధమవుతున్నాయి. మార్చి చివరి వారం థియేటర్లలోకి వస్తున్న చిత్రాలు కథలతోనే ప్రేక్షకులను ఆకట్టుకోవాలని లక్ష్యంగా పెట్టుకున్నాయి. మార్చి నెలలో ఇప్పటికే పెద్ద సినిమాలు తమ అదృష్టాన్ని పరీక్షించుకున్న నేపథ్యంలో ఇప్పుడు చిన్న సినిమాల వంతు వచ్చింది. యంగ్ హీరోలు, కొత్త కాన్సెప్ట్‌లు, విభిన్న కథలతో ప్రేక్షకుల ముందుకు రాబోతున్నారు. ఈ వారం విడుదలలలో ‘బ్యాండ్ మేళం’ ముందంజలో ఉంది. ‘కోర్ట్’ మూవీతో గుర్తింపు పొందిన హర్ష్ రోషన్, శ్రీదేవి జంటగా నటించిన ఈ చిత్రం గ్రామీణ నేపథ్యంలో బావ మరదళ్ల ప్రేమ కథగా తెరకెక్కింది. యూత్ ఫుల్ ఎంటర్‌టైనర్‌గా రూపొందిన ఈ సినిమా మార్చి 26న విడుదల కానుంది. ప్రియదర్శి, ద్రిషిక చందర్ జంటగా నటించిన ‘సుయోధన’ సైకలాజికల్ థ్రిల్లర్‌గా మార్చి 27న ప్రేక్షకుల ముందుకు రానుంది. హీరోకి మాత్రమే కనిపించే ప్రత్యేక శక్తి చుట్టూ కథ నడవడం ఈ సినిమాపై ఆసక్తిని పెంచుతోంది. సుడిగాలి సుధీర్, దివ్యభారతి జంటగా నటించిన ‘G.O.A.T’ చిత్రం కూడా మార్చి 26న రిలీజ్ అవుతోంది. క్రికెట్ బ్యాక్‌డ్రాప్‌లో సరదా కామెడీ కథతో ఈ సినిమా తెరకెక్కింది. తమిళంలో రూపొందిన యూత్ ఫుల్ ఎంటర్‌టైనర్ ‘యూత్’ చిత్రం తెలుగు డబ్బింగ్‌తో మార్చి 26న విడుదల కానుంది. స్కూల్ నేపథ్యంలో సాగనున్న ఈ కథ యంగ్ ఆడియెన్స్‌ను టార్గెట్ చేస్తోంది. సంగీత దర్శకుడు జీవీ ప్రకాష్ కుమార్ ప్రధాన పాత్రలో నటించిన ‘హ్యాపీ రాజ్’ చిత్రం మార్చి 27న ప్రేక్షకుల ముందుకు రానుంది. ఈ సినిమాతో హీరో అబ్బాస్ మళ్లీ తెరపై కనిపించడం ప్రత్యేక ఆకర్షణగా మారింది.

ఓటీటీలో రిలీజ్‌లు

థియేటర్లతో పాటు ఓటీటీ వేదికల్లో కూడా ఈ వారం పలు సినిమాలు, వెబ్ సిరీస్‌లు విడుదలకు సిద్ధమయ్యాయి. అమెజాన్ ప్రైమ్ వీడియోలో ‘బైట్’, ‘ప్రెటీ లేథల్’, ‘హౌస్ ఆఫ్ డేవిడ్ సీజన్ 2’, ‘ఓ రోమియో’, ‘విష్ణు విన్యాసం’ స్ట్రీమింగ్‌కు రానున్నాయి. నెట్ ఫ్లిక్స్‌లో ‘హార్ట్ బ్రేక్ హై సీజన్ 3’, ‘హోమిసైడ్ సీజన్ 3’, ‘ఇన్ సైడ్ సీజన్ 3’, ‘సమ్ థింగ్ వెరీ బ్యాడ్ ఈజ్ గోయింగ్ టు హ్యాపెన్’, ‘ద రెడ్ లైన్’, ‘మర్దానీ 3’, ‘డిటెక్టివ్ హోల్’ విడుదల కానున్నాయి. జియో హాట్ స్టార్‌లో ‘ది కమ్ బ్యాక్’, ‘డేర్ డెవిల్ బోర్న్ అగైన్ 2’, ‘కాట్టాన్’, ‘హన్నా మొంటానా స్పెషల్’, ‘చిరాయ’ ప్రసారం కానున్నాయి. జీ5లో ‘ప్రజాపతి 2’, ‘హే కాయ్ నవీన్’, ‘భానుప్రియ భూటర్ హోటల్’ స్ట్రీమింగ్‌కు సిద్ధమయ్యాయి. యాపిల్ టీవీలో ‘ఫర్ ఆల్ మ్యాన్ కైండ్ సీజన్ 5’ విడుదల కానుంది. ఆహాలో ‘అమరావతికి ఆహ్వానం’, సన్ నెక్స్ట్‌లో ‘సీతా పయనం’, ఈటీవీ విన్‌లో ‘సుమతీ శతకం’, ‘సీతారాములు’ ఇప్పటికే స్ట్రీమింగ్‌లో ఉన్నాయి.
ఇటీవలి కాలంలో ప్రేక్షకుల అభిరుచులు మారుతున్నాయి. కథ బాగుంటే చిన్న సినిమాలకూ భారీ ఆదరణ లభిస్తోంది. ఈ నేపథ్యంలో ఈ వారం విడుదలవుతున్న చిత్రాలు కూడా తమ కంటెంట్‌తోనే ప్రేక్షకుల మనసులు గెలుచుకునేందుకు సిద్ధమవుతున్నాయి.