ఇన్‌సర్వీస్ ఉపాధ్యాయులకు టెట్‌ మినహాయింపు
కేంద్రం జోక్యం చేసుకోవాలి
టీ ఉమ్మడి కరీంనగర్ జిల్లా అధ్యక్షుడు ఎం.ఏ. ఖాద్రీ
కాకతీయ, కరీంనగర్ : ఇన్‌సర్వీస్‌లో పనిచేస్తున్న ప్రభుత్వ ఉపాధ్యాయులకు టెట్‌ నుంచి మినహాయింపు కల్పించే దిశగా కేంద్ర ప్రభుత్వం తక్షణ చర్యలు తీసుకోవాలని తెలంగాణ ఎంప్లాయిస్ అసోసియేషన్ ఉమ్మడి కరీంనగర్ జిల్లా అధ్యక్షుడు ఎం.ఏ. ఖాద్రీ ఒక ప్రకటనలో విజ్ఞప్తి చేశారు.సుప్రీంకోర్టు టెట్‌ అర్హతపై ఇచ్చిన తాజా ఆదేశాలను పునర్విమర్శించాల్సిన అవసరం ఉందని, ఈ విషయంపై రాష్ట్ర ప్రభుత్వం మరియు ఉపాధ్యాయ సంఘాలు ఇప్పటికే పునర్విచారణ పిటిషన్‌లు దాఖలు చేసినట్లు పేర్కొన్నారు. టెట్‌ ఒత్తిడితో కొందరు ఉపాధ్యాయులు ఆత్మహత్యలు చేసుకోవడం వంటి ఘటనలు హృదయ విదారకమన్న ఆయన, ఇలాంటి విషాదాలు నెలకొనకుండా ఉపాధ్యాయులు ధైర్యంగా ఉండాలని సూచించారు.టెట్‌ అమలు కంటే ముందు సేవలో చేరిన ఉపాధ్యాయులందరికీ మినహాయింపు ఇవ్వడం న్యాయసమ్మతమని ఖాద్రీ అభిప్రాయపడ్డారు. టెట్‌ అంశంలో ఉపాధ్యాయులు ప్రతిరోజూ గందరగోళంలో ఉన్న కారణంగా రాష్ట్ర ప్రభుత్వం స్పష్టమైన మార్గదర్శకాలు జారీ చేయాలని ఆయన డిమాండ్ చేశారు.
