కరీంనగర్లో 28న జానపద వృత్తి కళాకారుల రాష్ట్ర సదస్సు
మంత్రి పొన్నం ప్రభాకర్ చేతుల మీదుగా పోస్టర్ ఆవిష్కరణ
కాకతీయ, కరీంనగర్ : తెలంగాణ జానపద సకల వృత్తి కళాకారుల సంఘం ఆవిర్భావ రాష్ట్ర సదస్సుకు సంబంధించిన పోస్టర్ను రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ బంజారాహిల్స్లోని మంత్రి నివాసంలో ఆవిష్కరించారు. ఈ సందర్భంగా సంఘ ప్రతినిధులు మంత్రికి సదస్సుకు ప్రత్యేక ఆహ్వానంగా ఆహ్వాన పత్రం అందజేశారు.కార్యక్రమంలో రాష్ట్రస్థాయి సిల్వర్,గోల్డ్ అవార్డు గ్రహీత, ప్రముఖ సంఘసేవకుడు వలస సుభాష్ చంద్రబోస్, తెలంగాణ జానపద సకల వృత్తి కళాకారుల సంఘం రాష్ట్ర అధ్యక్షురాలు తాళ్లపల్లి సంధ్య పాల్గొన్నారు. ఈనెల 28న కరీంనగర్లోని కళాభారతిలో జరిగే రాష్ట్ర సదస్సుకు హాజరుకావాలని తెలంగాణ సాంస్కృతిక సారధి చైర్మన్ డాక్టర్ గుమ్మడి వెన్నెల, తెలంగాణ భాషా సాంస్కృతిక శాఖ సంచాలకుడు నరసింహ రెడ్డిని కూడా ఆహ్వానించారు.ఈ సందర్భంగా సంఘ ప్రతినిధులు మాట్లాడుతూ.రాష్ట్రవ్యాప్తంగా వేలాది మంది జానపద, సకల వృత్తి కళాకారులు ఉన్నారని, వారికి తెలంగాణ భాషా సాంస్కృతిక శాఖ ద్వారా గుర్తింపు కార్డులు జారీ చేయాలని ప్రభుత్వం చర్యలు తీసుకోవాలని కోరారు. వృద్ధ కళాకారులకు పెన్షన్లు మంజూరు చేయాలని, బతుకమ్మ,బోనాల వంటి రాష్ట్ర పండుగల్లో జానపద కళాకారులకు మరింత అవకాశాలు కల్పించాలని కోరారు.ఈనెల 28న జరగనున్న రాష్ట్ర సదస్సుకు అధిక సంఖ్యలో కళాకారులు తరలివచ్చి సమావేశాన్ని విజయవంతం చేయాలని వారు ఆకాంక్షించారు. కార్యక్రమంలో కళాకారులు ఎద్దుమమత, కేశబోయిన రమ, ఈర్ల స్వాతి తదితరులు పాల్గొన్నారు.
