ఇంగ్లాండ్కు సెమిస్ సవాల్..!
రెండు టైటిళ్లను ఎగరేసుకుపోయిన ఇంగ్లీష్ జట్టు
ఈ ప్రపంచకప్లో ఏడు మ్యాచ్ల్లో ఆరు విజయాలతో అద్భుత ప్రదర్శన
సూపర్ 8 దశలో తిరుగులేని ఆధిపత్యం చూపిన ఇంగ్లాండ్
కెప్టెన్ బ్రూక్ అద్భుత ఫామ్ జట్టుకు పెద్ద బలం
జట్టుకు ఆయుధంగా మారుతున్న స్పిన్ బలం
సెమిస్లో భారత్తో మళ్లీ ఉత్కంఠ పోరు తప్పదు..!
కాకతీయ,స్పోర్ట్స్ : టీ -20 ప్రపంచకప్ 2026 టోర్నీలో ఇంగ్లాండ్ జట్టు మరోసారి తన సత్తా చాటుతోంది. ఇప్పటికే రెండు సార్లు కప్ గెల్చుకున్న ఇంగ్లీష్ జట్టు… మూడోసారి కప్ను కైవసం చేసుకోవడానికి ఉవ్విళ్లూరుతోంది. అందుకు తగ్గట్టుగానే పక్కా గేమ్ ప్లాన్ను రూపొందించుకుంటూ సెమిస్కు చేరుకుంది. గ్రూప్ దశలో చిన్న తడబాటు తప్పితే, మొత్తం టోర్నీ అంతా సమతౌల్య ప్రదర్శనతో ప్రత్యర్థులను అధిగమించింది. ఏడు మ్యాచ్ల్లో ఆరు విజయాలు సాధించడం యాదృచ్ఛికం కాదు. అది జట్టు ప్రణాళిక, బలమైన బ్యాటింగ్ లైనప్, స్థిరమైన ఆటతీరు ప్రదర్శన, క్రమబద్ధమైన బౌలింగ్కు నిదర్శనం. గ్రూప్ దశలో తొలి మ్యాచ్లో నేపాల్పై తక్కువ తేడాతో గెలిచిన ఇంగ్లాండ్, వెస్టిండీస్ చేతిలో ఓటమి పాలైంది. ఆ ఓటమి తర్వాతే జట్టు మేలుకుంది. స్కాట్లాండ్, ఇటలీలపై పూర్తి ఆధిపత్యంతో గెలిచి సూపర్ దశకు చేరింది. అక్కడి నుంచే అసలు ఇంగ్లాండ్ కనిపించింది. శ్రీలంక, పాకిస్థాన్, న్యూజిలాండ్లపై వరుస విజయాలు సాధించి గ్రూప్లో అగ్రస్థానంలో నిలిచింది. ప్రతి మ్యాచ్లో ఒక కొత్త హీరో ముందుకొచ్చాడు.
కెప్టెన్గా బ్రూక్ ధైర్య నిర్ణయాలు
హ్యారీ బ్రూక్ ఈ టోర్నీలో ఇంగ్లాండ్కు పెద్ద బలమనే చెప్పాలి. పాకిస్థాన్పై కేవలం యాభై ఒక బంతుల్లో సెంచరీ సాధించడంతోనే బ్రూక్ సత్తా ఏంటో తెలిసిపోయింది. అతని ఆటలో దూకుడు ఉన్నా, బాధ్యత కూడా కనిపిస్తోంది. అవసరమైనప్పుడు వేగం పెంచడం, అవసరమైనప్పుడు ఇన్నింగ్స్ నిలబెట్టడం అతని ప్రత్యేకత. ఇక మరో స్టార్.. ఫిల్ సాల్ట్ ఓపెనర్గా నిలకడ ఆటతీరును ముచ్చటగొల్పుతున్నాడు. శ్రీలంకపై అరవై రెండు పరుగులు సాధించి జట్టుకు బలంగా మారాడు. పవర్ ప్లేలో అతడి దూకుడు ప్రత్యర్థులపై ఒత్తిడి పెంచుతోంది. విల్ జాక్స్ ఆల్రౌండర్గా కీలక పాత్ర పోషిస్తున్నాడు. న్యూజిలాండ్పై ముప్పై రెండు పరుగులతో పాటు కీలక వికెట్లు తీసి మ్యాచ్ను కట్టిపడేశాడు. బౌలింగ్ విభాగంలో అదిల్ రషీద్ అనుభవం, జోఫ్రా ఆర్చర్ వేగం, రెహాన్ అహ్మద్ స్పిన్ వైవిధ్యం ఇంగ్లాండ్కు బలంగా నిలిచాయి. మధ్య ఓవర్లలో వికెట్లు తీసి ప్రత్యర్థి రన్రేట్ను కట్టడి చేయడం ఈ ముగ్గురి ప్రత్యేకత.
బలాలు స్పష్టంగా… బలహీనతలు కనిపిస్తూనే
ఇంగ్లాండ్ బలం బ్యాటింగ్. దిగువ క్రమం వరకు భారీ షాట్లు ఆడగల ఆటగాళ్లు జట్టులో ఉన్నారు. స్పిన్ విభాగంలో వైవిధ్యం ఉంది. ఒత్తిడిలోనూ మ్యాచ్ను ముగించే నైపుణ్యం జట్టు ఆటగాళ్లలో ఉంది. అయితే టాప్ ఆర్డర్ కొన్నిసార్లు త్వరగా కుప్పకూలడం ఆ జట్టు వైఫల్యాలను ఎత్తి చూపుతోంది. పవర్ ప్లేలో బౌలర్లు అప్పుడప్పుడు ఎక్కువ పరుగులు ఇవ్వడం కూడా సమస్యగా మారుతోంది. భారత్తో జరిగే సెమీస్లో ఈ పొరపాట్లు రిపీట్ అయితే ఆ జట్టు భారీ మూల్యం చెల్లించక తప్పదు. వరల్డ్ బెస్ట్ బ్యాట్స్మెన్తో నిండి ఉన్న భారతజట్టుతో తలపడాలంటే ఆ జట్టు బౌలింగ్ మరింత మెరుగుపడాల్సిన అవసరం ఎంతైనా ఉంది. ఇప్పుడు భారత్తో సెమీఫైనల్ పోరు ఆసక్తికరంగా మారింది. గతంలో ఒకసారి ఇంగ్లాండ్ గెలిస్తే, మరొకసారి భారత్ ప్రతీకారం తీర్చుకుంది. రెండు జట్లు కూడా ఫామ్లో ఉన్నాయి. ఇంగ్లాండ్ బ్యాటర్లు దూకుడుగా ఆడితే మ్యాచ్పై పట్టుబడే అవకాశం ఉంది. కానీ భారత స్పిన్నర్లు మధ్య ఓవర్లలో వికెట్లు సాధిస్తే ఇంగ్లాండ్కు కష్టాలు తప్పవు. మొత్తంగా చూస్తే ఇంగ్లాండ్ జట్టు సమతౌల్యంతో ముందుకెళ్తోంది. ప్రణాళిక ప్రకారం ఆడితే మరోసారి ఫైనల్కు చేరే అవకాశాలు మెరుగ్గానే కనిపిస్తున్నాయి. కానీ సెమీస్లో ఒత్తిడిని ఎలా ఎదుర్కొంటుందన్నదే అసలు పరీక్ష.
