ఆర్కేపీ ఓసీ ఫేజ్– 2తో పూర్వవైభవం
డిసెంబర్ 3న పబ్లిక్ హియరింగ్
ఓసీతో ప్రజలకు ఇబ్బందులు లేవు
కాకతీయ, రామకృష్ణాపూర్ : మందమర్రి ఏరియా రామకృష్ణాపూర్ ప్రాంతంలో చేపట్టే ఓపెన్ కాస్ట్ ప్రాజెక్ట్ ఫేజ్ –2 కొరకు అన్ని అనుమతులు లభించినట్లు ఏరియా జనరల్ మేనేజర్ ఎన్.రాధాకృష్ణ తెలిపారు. బుధవారం స్థానిక ఆర్కేపీ ఓపెన్ కాస్ట్ ప్రాజెక్ట్ కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు. ఓసీ ప్రాజెక్ట్ ఫేజ్ 2 లో బాగంగా డిసెంబర్ 3 న నిర్వహించే పబ్లిక్ హియరింగ్ (ప్రజాభిప్రాయ సేకరణ)లో వివిధ రాజకీయ పార్టీల నాయకులు,యూనియన్ నేతలు,అన్ని వర్గాల ప్రజలు పాల్గొని విజయవంతం చేయాలన్నారు. 1209 హెక్టార్ల భూ విస్తీర్ణంలో జరిగే ప్రాజెక్ట్ తో రామకృష్ణాపూర్ పట్టణానికి పూర్వ వైభవం వస్తుందన్నారు. ప్రాజెక్ట్ ఏర్పాటుతో స్థానికంగా ఉన్న నిరుద్యోగులకు ఉపాధి అవకాశాలు లభిస్తాయని చెప్పారు. ఆర్కే 4,3,2,1 మీదుగా సాగే ప్రాజెక్ట్ 18 సంవత్సరాల భవిష్యత్తు ఉందన్నారు. ఆర్కే ఫోర్ గడ్డ ప్రాంతానికి ఓపెన్ కాస్ట్ ఫేజ్ 2 ప్రాజెక్ట్ తో ఎలాంటి ప్రమాదం లేదన్నారు. కార్మిక వాడల్లో మెరుగైన సౌకర్యాలు కల్పించేందుకు డి.ఎం.ఎఫ్.టి,సి.ఎస్.ఆర్ ప్రత్యేక నిధులతో మరింత అభివృద్ధి చేయనున్నట్లు చెప్పారు. జిఎంతో పాటు వివిధ విభాగాలకు చెందిన అధికారులు పాల్గొన్నారు.
