ప్రజా సేవే మన లక్ష్యం కావాలి
సంక్షేమ పథకాలు అర్హులందరికీ చేర్చాలి
అధికారులు ప్రజా సేవకుల్లా పనిచేయాలి
భద్రాద్రి జిల్లా కలెక్టర్ జితేష్ పాటిల్
జాతీయ జెండా ఆవిష్కరించి..వేడుకలు
కాకతీయ, కొత్తగూడెం : ప్రభుత్వ ఉద్యోగులందరూ ప్రజా సేవకులుగా పని చేయాలని, ప్రభుత్వం అమలు చేస్తున్న సంక్షేమ పథకాలు అర్హులైన ప్రతి ఒక్కరికీ చేరేలా బాధ్యతగా వ్యవహరించాలని జిల్లా కలెక్టర్ జితేష్ పాటిల్ అన్నారు. సోమవారం ఐడిఓసి కార్యాలయం, ప్రగతి మైదాన్లో నిర్వహించిన గణతంత్ర దినోత్సవ వేడుకల్లో ఆయన పాల్గొని జాతీయ జెండాను ఆవిష్కరించారు. ఈ సందర్భంగా కలెక్టర్ మాట్లాడుతూ… ఉద్యోగ జీవితం మొత్తం ప్రజా సంక్షేమాన్ని లక్ష్యంగా సాగాలని, సేవా కాలం ప్రజల అభ్యున్నతికే అంకితమవాలని అధికారులకు సూచించారు. దేశభక్తుల త్యాగాలు, ఆశయాల స్ఫూర్తితో భారత సంస్కృతి ప్రపంచానికి ఆదర్శంగా నిలిచిందన్నారు. జిల్లాలో అమలవుతున్న అభివృద్ధి, సంక్షేమ కార్యక్రమాల ప్రగతిని ప్రజలకు తెలియజేయడంలో ఆనందంగా ఉందని తెలిపారు.
మహిళల సంక్షేమానికి ప్రత్యేక దృష్టి
మహిళల సంక్షేమం దిశగా అమలవుతున్న మహాలక్ష్మి ఉచిత బస్సు ప్రయాణ పథకం ద్వారా మహిళలకు ఉచిత ఆర్టీసీ ప్రయాణ సౌకర్యం కల్పించబడుతోందన్నారు. ఈ పథకం మహిళల భద్రత, స్వేచ్ఛ, ఆర్థిక భారం తగ్గింపులో కీలక పాత్ర పోషిస్తోందని పేర్కొన్నారు. ప్రజలకు మెరుగైన వైద్య సేవలు అందించాలనే లక్ష్యంతో రాజీవ్ ఆరోగ్య శ్రీ కార్యక్రమాన్ని అమలు చేస్తున్నట్లు తెలిపారు. కార్పొరేట్ స్థాయి వైద్య సేవలు, ఉచిత పరీక్షలు, ఆరోగ్య శిబిరాలు, మహిళల ఆరోగ్య పరీక్షల ద్వారా ప్రజల ఆరోగ్య భద్రతకు ప్రభుత్వం పెద్దపీట వేస్తోందన్నారు. వ్యవసాయ రంగంలో రైతును రాజుగా నిలబెట్టాలనే దృఢ సంకల్పంతో ప్రభుత్వ విధానాలు అమలవుతున్నాయని చెప్పారు. రైతు రుణమాఫీ, రైతు బీమా, వ్యవసాయ యాంత్రీకరణ, రైతు వేదికల ద్వారా అవగాహన కార్యక్రమాలు నిర్వహిస్తూ రైతుల ఆదాయం పెంపుదలపై ప్రత్యేక శ్రద్ధ చూపుతోందన్నారు.
సాగునీటి వసతులు–గృహ పథకాలు
సీతారామ ఎత్తిపోతల పథకం ద్వారా ప్రధాన కాలువ పనులు పూర్తిచేసి పంప్ హౌసులు ప్రారంభించామన్నారు. జిల్లాలో కొత్త ఆయకట్టు అభివృద్ధి, చెరువుల ఆయకట్టు స్థిరీకరణ కోసం ఉప కాలువల పనులు కొనసాగుతున్నాయని తెలిపారు. పేదల సొంతింటి కల నెరవేర్చడమే లక్ష్యంగా ఇందిరమ్మ ఇండ్ల పథకాన్ని ప్రభుత్వం ప్రతిష్టాత్మకంగా అమలు చేస్తోందన్నారు. గృహజ్యోతి పథకం ద్వారా వ్యవసాయంతో పాటు అన్ని రంగాలకు నిరంతర విద్యుత్ సరఫరా అందిస్తూ పేద కుటుంబాలపై విద్యుత్ చార్జీల భారం తగ్గిస్తున్నట్లు చెప్పారు. పౌర సరఫరాల శాఖ ద్వారా చౌకధర దుకాణాలు, మధ్యాహ్న భోజన పథకం, ధాన్యం కొనుగోలు కేంద్రాల నిర్వహణ ద్వారా ఆహార భద్రత కల్పిస్తున్నామన్నారు. విద్యారంగంలో మౌలిక సదుపాయాల అభివృద్ధి, పీఎం శ్రీ పాఠశాలలు, గ్రంథాలయాల ఏర్పాటు, పదో తరగతి ఫలితాల మెరుగుదలకు ప్రత్యేక తరగతులతో విద్యకు అత్యున్నత ప్రాధాన్యం ఇస్తున్నట్లు తెలిపారు. కార్యక్రమంలో జిల్లా ఎస్పీ రోహిత్ రాజు, ఇతర శాఖల అధికారులు తదితరులు పాల్గొన్నారు.
