ప్రభుత్వ ఆసుపత్రులపై ప్రజలకు నమ్మకం పోతోంది
కేంద్ర నిధులను వాడుకోవడంలో రాష్ట్ర ప్రభుత్వం విఫలం
త్వరలో జమ్మికుంట రైల్వే స్టేషన్ ఆధునీకరణ
స్పోర్ట్స్ స్టేడియం నిర్మాణానికి నిధులు మంజూరు చేస్తా
పరికరాలను వాడుకొకుంటే వాపస్ తీసుకుంటానని స్పష్టీకరణ
కేంద్ర హోంశాఖ సహాయ మంత్రి బండి సంజయ్ కుమార్
కాకతీయ, కరీంనగర్ : కేంద్ర హోంశాఖ సహాయ మంత్రి బండి సంజయ్ కుమార్ ప్రభుత్వ ఆసుపత్రుల పరిస్థితిపై తీవ్ర ఆవేదన వ్యక్తం చేశారు. జిల్లాలోని పలు ప్రభుత్వ ఆసుపత్రుల్లో సూది, మందులు, దూది కూడా అందుబాటులో లేక ప్రజల్లో నమ్మకం తగ్గిపోతుందని అన్నారు. కేంద్రంలోని నరేంద్ర మోదీ ప్రభుత్వం నేషనల్ హెల్త్ మిషన్ ద్వారా భారీగా నిధులు ఇస్తున్నా వాటిని సరిగా వినియోగించడంలో రాష్ట్ర ప్రభుత్వం పూర్తిగా విఫలమైందన్నారు. జమ్మికుంట ఏరియా ఆసుపత్రిని శనివారం జిల్లా కలెక్టర్ పమేలా సత్పతితో కలిసి పరిశీలించిన ఆయన రూ.1 కోటి విలువైన 15 అత్యాధునిక వైద్య పరికరాలను అందజేశారు. అనంతరం రోగులను పరామర్శించి అందుతున్న వైద్య సేవల గురించి సమాచారం తీసుకున్నారు. డాక్టర్లతో నిర్వహించిన సమావేశంలో ఆసుపత్రి సమస్యలపై సమగ్ర వివరాలు సేకరించారు. ప్రభుత్వ ఆసుపత్రుల్లో చికిత్స పొందేది పేదలు, మధ్యతరగతి ప్రజలేనని వారికి ప్రైవేట్ ఆసుపత్రుల్లో చికిత్స చేయించుకునే స్థోమత లేకపోవడంతో ప్రభుత్వ వైద్య సేవలను మరింత బలపరచడం అవసరమని ఆయన స్పష్టం చేశారు. తన పుట్టిన రోజు సందర్భంగా వేములవాడ, జమ్మికుంట, హుజూరాబాద్, హుస్నాబాద్ ఆసుపత్రులకు ఎన్ఎండీసీ సీఎస్సార్ నిధులతో రూ.4 కోట్ల విలువైన పరికరాలను అందించానని తెలిపారు. జమ్మికుంట ఆసుపత్రికి అందించిన ఈసీజీ, అల్ట్రాసౌండ్ స్కానింగ్, ఆటోక్లేవ్, డయాథెర్మి, అనెస్థిషియా వర్క్స్టేషన్, ఎమర్జెన్సీ రికవరీ ట్రాలీ, సిరంజ్ పంప్ వంటి పరికరాలను రోగుల సేవలో వినియోగించాలని సూచించారు. పరికరాలు వాడకపోతే వాపస్ తీసుకుని ఇతర ఆసుపత్రులకు ఇస్తా అని స్పష్టమైన హెచ్చరిక జారీ చేశారు. త్వరలో ఎంపీ లాడ్స్ నిధులతో ఎక్స్రే యంత్రాన్ని కూడా అందజేస్తానని ప్రకటించారు. కొన్ని ఆసుపత్రుల్లో అంబులెన్సులు, పరికరాలు వాడకపోవడం బాధాకరమన్నారు. ఇలాంటి నిర్లక్ష్యాన్ని సహించబోమని స్పష్టం చేశారు. వేములవాడ, కరీంనగర్ ఆసుపత్రుల్లో పరికరాలు వాడకపోతే ఇప్పటికే వాపస్ తీసుకున్నట్టు గుర్తుచేశారు.
చెక్డ్యామ్లు కమిషన్ల కోసం నిర్మిస్తున్నారు
చెక్డ్యాం కూలిపోయిన ఘటనపై స్పందించిన కేంద్ర మంత్రి బండి సంజయ్ చెక్డ్యామ్లు ప్రజలకోసం, రైతులకోసం నిర్మించే పనులు కాకుండా కమీషన్ల కోసం చేస్తున్న నిర్మాణాలుగా మారిపోయాయని ఘాటుగా విమర్శించారు. గత ప్రభుత్వం, ప్రస్తుత ప్రభుత్వం రెండింటి కాలంలోనూ బడా కాంట్రాక్టర్లకు బిల్లులు నిరవధికంగా చెల్లిస్తూనే ఉన్నారని నాసిరకం పనులు చేస్తున్నప్పటికీ ఎవ్వరూ పట్టించుకోవడం లేదని ఆగ్రహం వ్యక్తం చేశారు. ప్రణాళిక, నాణ్యత లేని పనుల కారణంగానే చెక్డ్యాం లు వరుసగా కూలిపోతున్నాయని తెలిపారు. గత ఆరు నెలలుగా ఈ సమస్యలపై నిరంతరం ఫిర్యాదులు వస్తున్నప్పటికీ చర్యలు తీసుకునే ప్రయత్నం కూడా లేదని ఆయన విమర్శించారు. సిరిసిల్ల, కరీంనగర్ జిల్లాల్లో ఇదే తరహా ఘటనలు గతంలోనూ జరిగినట్లు గుర్తుచేశారు. కాంగ్రెస్ ప్రభుత్వానికి నిజమైన చిత్తశుద్ధి ఉంటే వెంటనే చెక్డ్యాం కూలిపోయిన ఘటనలపై విచారణ చేపట్టి బాధ్యులపై కఠిన చర్యలు తీసుకోవాలని డిమాండ్ చేశారు. అలాగే నాసిరకం పనులు చేసిన కాంట్రాక్టర్ల ఆస్తులను కూడా సీజ్ చేయాల్సిన అవసరం ఉందని స్పష్టం చేశారు. అప్పుడు మాత్రమే భవిష్యత్తులో ఇలాంటి పనులకు నియంత్రణ ఉంటుందని అన్నారు. బీఆర్ఎస్ ప్రభుత్వంలో పనిచేసిన కొందరు అధికారులను కూడా పైసలు తీసుకుని ప్రస్తుత ప్రభుత్వం కీలక పదవుల్లో కొనసాగిస్తోందని ఆరోపించారు. కాంగ్రెస్ ప్రభుత్వం కూడా కమీషన్ల గురించే ఆలోచిస్తోందని ప్రజల ప్రయోజనాలు మాత్రం పూర్తిగా విస్మరించబడుతున్నాయని మండిపడ్డారు. అలాగే జమ్మికుంట అభివృద్ధిపై మాట్లాడుతూ జమ్మికుంట స్పోర్ట్స్ స్టేడియం నిర్మాణం, రైల్వే స్టేషన్ ఆధునీకరణకు సంబంధించిన ప్రతిపాదనలు సిద్ధం చేస్తున్నామని తెలిపారు. ఈ రెండు పనులు త్వరలోనే పూర్తవుతాయని ఆయన హామీ ఇచ్చారు.
