ఓసి ప్రాజెక్ట్ ఫేజ్ – 2 ప్రజాభిప్రాయ సేకరణ
చర్చలు, సమావేశాలలో అధికారులు బిజిబిజి
వేర్వేరుగా కాల‌నీ వాసుల‌తో సమావేశాల ఏర్పాటు
కాకతీయ, రామకృష్ణాపూర్ : సింగరేణి ఆధ్వర్యంలో ఏర్పాటు చేసే ఆర్కే ఓసి ప్రాజెక్ట్ ఫేజ్ – 2 ప్రజాభిప్రాయ సేకరణ కొరకు చర్చలు,సమావేశాలతో అధికారులు బిజీ అయ్యారు. మొదట సింగరేణిలో వివిధ యూనియన్ నేతలతో నిర్వహించిన సమావేశంలో ప్రాజెక్ట్,ప్రజాభిప్రాయ సేకరణ వంటి అంశాలపై పూర్తి స్థాయిలో చర్చించారు. అలాగే వివిధ రాజకీయ పార్టీలకి చెందిన నేతలతో సైతం సమావేశాలు జరిపారు. అంతకు ముందు మీడియా ప్రతినిధులతో సమావేశం ఏర్పాటు చేసి పూర్తి వివరాలను వెల్లడించారు. డిసెంబర్ 3 న చేపట్టే పబ్లిక్ హియరింగ్ (ప్రజాభిప్రాయ సేకరణకు) కట్టు దిట్టమైన భద్రత బలగాల మ‌ధ్య సాగ‌నున్న‌ట్లు స‌మాచారం. వివిధ శాఖలకు చెందిన అధికారులతో పాటు సింగరేణి సి అండ్ ఎండీ, ఇతర డైరెక్టర్లు, ఇంజనీర్లు,ఏరియా అధికారులు రానున్నారు. కాగా ఆర్కే ఫోర్ గడ్డ,శాంతి నగర్ ప్రాంత ప్రజల సమస్యలు మాత్రం పట్టించుకోవడం లేదంటూ వారు ఆరోపిస్తున్నారు. చర్చలకు పిలిచి రాకపోవడం పట్ల తప్పుపడుతున్నారు.
గడ్డకు దూరంగానే ఫేజ్ 2 ప్రాజెక్ట్
ఆర్కే ఫోర్ గడ్డ,శాంతి నగర్ ప్రాంతానికి చెందిన స్థానికులతో శనివారం మందమర్రి ఏరియా జనరల్ మేనేజర్ రాధాకృష్ణ సమావేశాన్ని నిర్వహించారు. ఓపెన్ కాస్ట్ ప్రాజెక్ట్ ఫేజ్ – 2 మ్యాప్ ప్రొజెక్టర్లో చూపించారు. ఆర్కే ఫోర్ గడ్డ నుంచి ఐదు వందల మీటర్ల అవుతల ఫేజ్ 2 ప్రాజెక్ట్ వస్తున్నట్లు చెప్పారు. అనంతరం జిఎంతో స్థానికులు మాట్లాడారు గత పదేళ్లు ఎదుర్కొన్న ఇబ్బందులను గుర్తు చేశారు. మేమంతా ఓసికి వ్యతిరేకం కాదు వచ్చే దుమ్ముతో శ్వాసకోశ సంబంధిత వ్యాధులు వచ్చే అవకాశం ఉన్న నేపథ్యంలో సింగరేణి భూమిలో స్థలాలు కేటాయిస్తే ప్రాంతాన్ని వోదిలివెళ్తామని జిఎంతో చెప్పారు. జిఎం స్పందిస్తూ డిసెంబర్ 3 న జరిగే పబ్లిక్ హియరింగ్ (ప్రజాభిప్రాయ సేకరణలో) ఉన్నత అధికారుల ముందు మీ డిమాండ్లను ఉంచాలన్నారు.
