సీఎం రేవంత్ రెడ్డి బహిరంగ సభ ఏర్పాట్లను పరిశీలించిన మంత్రి పొన్నం
కాకతీయ, కరీంనగర్ : డిసెంబర్ 3న ముఖ్యమంత్రి రేవంత్ రెడ్డి హుస్నాబాద్ నియోజకవర్గంలో నిర్వహించే పర్యటనలో భాగంగా అక్కన్నపేట రోడ్డులో ఏర్పాటు చేస్తున్న బహిరంగ సమావేశ స్థలాన్ని మంత్రి పొన్నం ప్రభాకర్ శనివారం స్థానిక నాయకులతో కలిసి పరిశీలించారు.సభ స్థలంలో భద్రతా ఏర్పాట్లు, మౌలిక వసతులు, పార్కింగ్ సదుపాయాలు, ప్రజలకు అసౌకర్యం కలగకుండా చూడాల్సిన అంశాలపై మంత్రి అధికారులకు పలు సూచనలు చేశారు. ఏర్పాట్లను వేగవంతం చేయాలని ఆదేశించారు.మంత్రి పొన్నం ప్రభాకర్ మాట్లాడుతూ.ప్రజాపాలన ప్రభుత్వం ఏర్పడి రెండేళ్లు పూర్తయిన సందర్భంగా రాష్ట్రంలో జరుగుతున్న అభివృద్ధి, భవిష్యత్తు ప్రణాళికలపై ముఖ్యమంత్రి రేవంత్ రెడ్డి హుస్నాబాద్లో ప్రజలను ఉద్దేశించి మాట్లాడనున్నారని తెలిపారు. ఈ పర్యటనలో నియోజకవర్గానికి సంబంధించిన అనేక అభివృద్ధి కార్యక్రమాలకు సీఎం శంకుస్థాపన చేయనున్నారని పేర్కొన్నారు.హుస్నాబాద్ను విద్యా, వైద్యం, పారిశ్రామికీకరణ, ఉపాధి అవకాశాలు, సాగునీటి రంగాల్లో కేంద్రంగా తీర్చిదిద్దుతున్నామని మంత్రి తెలిపారు. ప్రజల ఆకాంక్షలు నెరవేర్చే పర్యటనగా ఇది నిలుస్తుందని అన్నారు.ఈ కార్యక్రమానికి ముఖ్యమంత్రి తో పాటు పలువురు కేబినెట్ మంత్రులు హాజరవుతున్నారని తెలిపారు.హుస్నాబాద్ నియోజకవర్గ ప్రజలందరూ సభకు తరలివచ్చి విజయవంతం చేయాలని విజ్ఞప్తి చేశారు.
