అగ్ని ప్ర‌మాద బాధితుల‌కు మంత్రి అడ్లూరి ప‌రామ‌ర్శ
బాధితుల‌కు అండగా ఉంటామ‌న్న ఎమ్మెల్యే మేడిపల్లి సత్యం, మాజీ మంత్రి జీవన్ రెడ్డి
కాకతీయ, కరీంనగర్ : జగిత్యాల జిల్లా మల్యాల మండలం కొండగట్టులో శనివారం రాత్రి కరెంట్ షార్ట్ సర్క్యూట్ కారణంగా వరుసగా ఉన్న ప్లాస్టిక్ బొమ్మల దుకాణాలకు మంటలు అంటుకుని భారీ అగ్నిప్రమాదం సంభవించింది. ఈ ఘటనలో మొత్తం 26 దుకాణాలు పూర్తిగా దగ్ధమై, వ్యాపారులకు లక్షల రూపాయల ఆర్థిక నష్టం వాటిల్లింది. ఆదివారం ఉద‌యం సంక్షేమ శాఖ మంత్రి అడ్లూరి లక్ష్మణ్ కుమార్, చొప్పదండి ఎమ్మెల్యే మేడిపల్లి సత్యం, మాజీ మంత్రి జీవన్ రెడ్డి ఘటనాస్థలానికి చేరుకుని దగ్ధమైన దుకాణాలను స్వయంగా పరిశీలించారు. వ్యాపారులను పరామర్శించి, సమస్యలను తెలుసుకొని, వారికి భరోసా క‌ల్పించారు. మంత్రి అడ్లూరి లక్ష్మణ్ కుమార్ ఘటనపై పూర్తిస్థాయి విచారణ చేపట్టడానికి పోలీసులు ఆదేశాలు జారీ చేసినట్లు, అలాగే విద్యుత్ శాఖ మరియు రెవెన్యూ శాఖల ద్వారా ప్రభుత్వ స్థాయి ఆర్థిక సాయం అందేలా చర్యలు తీసుకుంటున్నట్లు తెలిపారు. మంత్రి తెలిపారు, చిన్న వ్యాపారులు నష్టపోకుండా ప్రభుత్వం ఎల్లప్పుడూ అండగా ఉంటుందని అన్నారు.
