మేడారంలో మెగా వైద్య భద్రతా
యాభై పడకల సూపర్ స్పెషాలిటీ ఆసుపత్రి ఏర్పాటు
ముప్పై ప్రాంతాల్లో ప్రత్యేక వైద్య శిబిరాలు
ఎనిమిది వందల మందితో డాక్టర్ల బృందం
జంపన్న వాగులో భక్తులకు పూర్తి భద్రత
కాకతీయ, తెలంగాణ బ్యూరో : మేడారం శ్రీ సమ్మక్క–సారలమ్మ మహాజాతరకు తరలివచ్చే లక్షలాది భక్తుల ఆరోగ్య రక్షణకు రాష్ట్ర ప్రభుత్వం విస్తృత స్థాయిలో ఏర్పాట్లు చేపట్టింది. సురక్షిత తాగునీరు, ముమ్మర పారిశుధ్య చర్యలతో పాటు జంపన్న వాగులో నీటి కలుషితాన్ని నివారించే చర్యలు చేపడుతూ, భారీ ఎత్తున వైద్య సదుపాయాలను అందుబాటులోకి తీసుకొచ్చింది. జాతర ప్రధాన వేదిక సమీపంలోని టీటీడీ కల్యాణ మండపంలో యాభై పడకల సూపర్ స్పెషాలిటీ ఆసుపత్రిని ఏర్పాటు చేశారు. అలాగే జాతర ప్రాంతాల్లో ముప్పై చోట్ల ప్రత్యేక వైద్య శిబిరాలను ఏర్పాటు చేసి, భక్తులకు ఇరవై నాలుగు గంటల పాటు వైద్య సేవలు అందించేలా చర్యలు తీసుకున్నారు.
వైద్య సిబ్బందితో భారీ ఏర్పాట్లు
జాతర సమయంలో ఎలాంటి వైద్య ఇబ్బందులు తలెత్తకుండా మొత్తం ఐదువేల నూట తొంభై రెండు మంది మెడికల్, పారా మెడికల్ సిబ్బందిని రంగంలోకి దించారు. ఇందులో ఆరు వందల నలభై తొమ్మిది మంది వైద్యాధికారులు, నూట యాభై నాలుగు మంది ఆయుష్ వైద్యులు, ఆరు వందల డెబ్బై మూడు మంది నర్సింగ్ అధికారులు, వెయ్యి తొమ్మిది వందల ఐదు మంది ఆశా వర్కర్లు, వెయ్యి నూట పదకొండు మంది పారా మెడికల్ సిబ్బంది, మూడు వందల ముప్పై ఒకరు సూపర్వైజరీ సిబ్బంది, ఏడువందల మంది ఇతర సిబ్బంది విధుల్లో పాల్గొంటున్నారు. జాతర ముగిసిన తర్వాత కూడా స్థానిక గిరిజనులకు ఆరోగ్య సమస్యలు తలెత్తకుండా పది ప్రత్యేక వైద్య శిబిరాలు నిర్వహించేలా ప్రభుత్వం నిర్ణయించింది. మేడారం పరిసర ప్రాంతాల్లోని ఏటూరు నాగారం, ములుగు, పస్రా, గోవిందరావుపేట, మంగపేట ప్రాంతాల్లో ఉన్న సముదాయ ఆరోగ్య కేంద్రాలను కూడా పటిష్ఠం చేశారు.
జంపన్న వాగులో సురక్షిత స్నానాలు
మేడారం జాతరకు వచ్చే భక్తులు విధిగా జంపన్న వాగులో పుణ్యస్నానాలు ఆచరిస్తారు. ఈ క్రమంలో ప్రమాదాలు జరగకుండా వాగు పొడవునా మూడు వందల ఇరవై ఐదు మంది సురక్షిత స్విమ్మర్లు, రక్షణ సిబ్బందిని నియమించారు. వీరిలో మత్స్య శాఖ ద్వారా రెండు వందల పది మంది స్విమ్మర్లు, పన్నెండు మంది సింగరేణి రెస్క్యూ టీమ్ సభ్యులు, వంద మంది రాష్ట్ర విపత్తు స్పందన దళ సిబ్బంది ఉన్నారు. అందరికీ లైఫ్ జాకెట్లు, ప్రత్యేక టీషర్టులు, సెర్చ్ లైట్లు, లైఫ్ సేవింగ్ పరికరాలు అందజేశారు. జాతర ప్రాంగణంలో ఎలాంటి అగ్నిప్రమాదాలు జరగకుండా రాష్ట్ర అగ్నిమాపక శాఖ విస్తృత ఏర్పాట్లు చేసింది. పదిహేను ఫైర్ బ్రిగేడ్ వాహనాలు, పన్నెండు మిస్ట్ బుల్లెట్స్, రెండు ఫైర్ ఇంజన్లను మోహరించారు. మొత్తం రెండు వందల అరవై ఎనిమిది మంది అగ్నిమాపక సిబ్బంది నిరంతరం విధుల్లో ఉంటారు. మొత్తానికి, మేడారం మహాజాతరలో భక్తుల ఆరోగ్యం, భద్రతకు ఎలాంటి లోటుపాట్లు లేకుండా ప్రభుత్వం సంపూర్ణ స్థాయిలో ఏర్పాట్లు చేపట్టిందని అధికారులు స్పష్టం చేస్తున్నారు.
