పీసీసీ అధ్యక్షుడుని కలిసిన కుడా ఛైర్మన్
కాకతీయ, హ‌న్మ‌కొండ : హనుమకొండ జిల్లా నూతన కాంగ్రేస్ పార్టీ డీసీసీ అధ్యక్షులుగా ఇటీవల నియమితులైన వరంగల్ కుడా ఛైర్మన్ ఇనగాల వెంకట్రామ్ రెడ్డి ఆదివారం తెలంగాణ పీసీసీ అధ్యక్షుడు బొమ్మ మహేష్ కుమార్ గౌడ్ ని ఆయన నివాసంలో మర్యాదపూర్వకంగా కలిసి శుభాకాంక్షలు పొందారు. ఈ సందర్భంగా మహేష్ కుమార్ గౌడ్ మాట్లాడుతూ జిల్లాలో కాంగ్రేస్ పార్టీని బలోపేతం చేయడంలో భాగంగా అన్ని స్థాయి నాయకులను కలుస్తూ ముందుకు సాగుతున్న ఇనగాల వెంకట్రామ్ రెడ్డి ప్రయత్నాలు పత్రికల్లో చూశానని, ఇది పార్టీకి చాలా శుభ సూచికమని అభినందించారు. అలాగే పార్టీ చేపడుతున్న అభివృద్ధి, సంక్షేమ కార్యక్రమాలను ప్రజలకు చేరవేయడంలో మరింత చురుకుదనంతో పనిచేయాలని సూచించారు. రాబోయే ప్రతి ఎన్నికల్లో కాంగ్రేస్ పార్టీ జెండా ఎగిరేలా కార్యాచరణ ప్రణాళికలు రూపొందించుకోవాలని మహేష్ కుమార్ గౌడ్ సూచించారు. జిల్లా స్థాయి నాయకత్వంలో ఉత్సాహం పెరుగుతున్న సందర్భంలో ఈ భేటీ ప్రాధాన్యత సంతరించుకుంది.
