చంపేసి.. సంచిలో కట్టేసి..!
పాపక్కపల్లి శివారులో దారుణ హత్య వెలుగులోకి
తాళ్లతో కట్టేసి హత్య..!? పథకం ప్ర‌కార‌మే క్రూరంగా హింసించి చంపారా..?
సంచ‌ల‌నం క‌లిగిస్తున్న ఘ‌ట‌న
కాకతీయ, కరీంనగర్ : కరీంనగర్ జిల్లా జమ్మికుంట మండలం పాపక్కపల్లి శివారులో శుక్రవారం ఓ దారుణ హత్య వెలుగులోకి వ‌చ్చింది. గుర్తు తెలియని వ్యక్తులు ఓ వ్యక్తిని దారుణంగా హత్య చేసి, తాళ్లతో కట్టేసి ప‌త్తి చేనులో ప‌డేశారు. శుక్రవారం ఉద‌యం ప‌త్తి చేనులోకి వెళ్లిన కొంత‌మంది విష‌యం గుర్తించి పోలీసుల‌కు స‌మాచారం అందించారు. హ‌త్య‌కు గురైన వ్య‌క్తి ఎవ‌ర‌న్న‌ది తెలిస్తే.. ద‌ర్యాప్తులో అస‌లు విష‌యాలు వెలుగులోకి రానుంది. తాళ్లతో కట్టేసి..చిత్ర హింస‌ల‌తో హ‌త్య‌కు పాల్ప‌డిన‌ట్లుగా మృత‌దేహంపై ఆన‌వాళ్ల‌ను బ‌ట్టి అర్థ‌మ‌వుతోంద‌ని పోలీసులు పేర్కొంటున్నారు. ప‌క్కా పథకం ప్ర‌కార‌మే ఈ హత్య జ‌రిగి ఉంటుంద‌ని భావిస్తున్నారు. హ‌త్య‌కు గుర‌యింది ఎవ‌రు..? అన్న‌ది తెలిస్తేనే కేసు ద‌ర్యాప్తు వేగంగా ముందుకు క‌దిలే అవ‌కాశం క‌నిపిస్తోంది. ఎక్క‌డో హత్య చేసి.. మార్గ మ‌ధ్య‌లోని ప‌త్తి చేనులో వదిలి వెళ్లిన‌ట్లుగా పోలీసులు అనుమానిస్తున్నారు.
