కాకతీయ, తెలంగాణ బ్యూరో: తెలంగాణ ప్రజలే కాకుండా పక్క రాష్ట్రాల ప్రజలు కూడా ఎంతో ఆతృతగా ఎదురుచూసిన ఖైరతాబాద్ బడా వినాయకుడి నిమజ్జన కార్యక్రమం శనివారంతో విజయవంతంగా పూర్తయింది. ఖైరతాబాద్ బడాగణేష్ గంగమ్మ ఒడికి చేరుకున్నాడు. ప్రతి సంవత్సరం భక్తులకు ప్రత్యేక ఆకర్షణగా నిలిచే ఈ మహా వినాయక విగ్రహం, ఈసారి కూడా విశేషంగా అలరించింది. 63 అడుగుల ఎత్తైన ఖైరతాబాద్ వినాయకుడి విగ్రహం హైదరాబాద్ నగరానికి ప్రత్యేక శోభనిచ్చింది. నిమజ్జనం చివరి రోజున భారీ సంఖ్యలో భక్తులు తరలివచ్చారు. ప్రత్యేకంగా రూపొందించిన హైడ్రాలిక్ క్రేన్లు, ట్రాలీలు సహాయంతో విగ్రహాన్ని హుస్సేన్సాగర్ సరస్సుకు తరలించారు.
ప్రతీ అడుగులోనూ “గణపతి బప్పా మోరియా” నినాదాలతో వాతావరణం మార్మోగింది. బండ్లు, బజ్జాలు, సంప్రదాయ వాద్యాలతో కూడిన శోభాయాత్ర భక్తులకు మరపురాని అనుభూతిని కలిగించింది. ఉదయం నుంచే ఖైరతాబాద్ ప్రాంతం జనసందోహంతో నిండిపోయింది. ఈ మహా నిమజ్జన యాత్రను సజావుగా నిర్వహించేందుకు పోలీసులు ప్రత్యేక బందోబస్తు ఏర్పాటు చేసింది. ట్రాఫిక్ డైవర్షన్లు అమలు చేసి, హుస్సేన్సాగర్ వైపు వచ్చే వాహనాలకు ప్రత్యామ్నాయ మార్గాలు చూపించారు. మొత్తం 3,000 మందికి పైగా సిబ్బంది భద్రతా చర్యల్లో పాల్గొన్నారు.
ప్రతిసారి మాదిరిగానే ఈసారి కూడా పర్యావరణ అనుకూలంగా నిమజ్జనం చేపట్టారు. విగ్రహం తయారీలో ప్లాస్టర్ ఆఫ్ పారిస్ బదులు మట్టి, సహజ వర్ణాలు ఉపయోగించారు. నిమజ్జన సమయంలో పర్యావరణ కాలుష్యం తక్కువగా ఉండేలా ప్రత్యేక జాగ్రత్తలు తీసుకున్నారు. ఖైరతాబాద్ వినాయకుడి నిమజ్జనం కేవలం ఒక ఆధ్యాత్మిక కార్యక్రమం మాత్రమే కాదు, ఇది హైదరాబాదు సంస్కృతిలో ప్రత్యేక స్థానాన్ని సంపాదించుకుంది. దాదాపు సగం శతాబ్దం చరిత్ర కలిగిన ఈ సంప్రదాయం, ప్రతి ఏడాది మరింత వైభవంగా కొనసాగుతోంది.
