ఇండోనేషియా, రష్యాలో భారీ భూకంపం.. సునామీ హెచ్చరిక జారీ..!!

కాకతీయ, నేషనల్ డెస్క్: ఇండోనేషియాలోని మధ్య పపువా ప్రావిన్స్లో శుక్రవారం (సెప్టెంబర్ 19, 2025) తెల్లవారుజామున భారీ భూకంపం సంభవించింది. రిక్టర్ స్కేలుపై దీని తీవ్రత 6.1గా నమోదైనట్లు యుఎస్ జియోలాజికల్ సర్వే (USGS) వెల్లడించింది. ఈ ప్రకంపనల కేంద్రం నబిరే నగరానికి దక్షిణంగా 28 కిలోమీటర్ల దూరంలో, భూమికి లోతుగా ఉందని సమాచారం. తాత్కాలికంగా ప్రాణనష్టం, ఆస్తినష్టం వంటి వివరాలు లభించకపోయినా, భూకంపం కారణంగా స్థానికులు భయాందోళనలకు గురయ్యారు.

ప్రపంచంలోనే అత్యధిక భూకంపాలు సంభవించే దేశాలలో ఇండోనేషియా ఒకటి. ఇది ఆసియా, ఆస్ట్రేలియా ఖండాల మధ్య ఉండి, పసిఫిక్ మహాసముద్రం వెంబడి విస్తరించింది. ఈ ప్రాంతాన్ని “రింగ్ ఆఫ్ ఫైర్” అని పిలుస్తారు. ప్రపంచ భూకంపాలలో దాదాపు 90 శాతం, అగ్నిపర్వత విస్ఫోటనాల్లో అధిక శాతం ఈ బెల్ట్‌లోనే సంభవిస్తాయి.ఇండోనేషియా ఇండో-ఆస్ట్రేలియన్, యురేషియన్, పసిఫిక్ ప్లేట్ల మధ్య ఉంది. ఈ ప్లేట్లు ఒకదానిపై ఒకటి కదిలినప్పుడు లేదా ఢీకొన్నప్పుడు భూకంపాలు సంభవిస్తాయి. నేల కింద జరిగే ఈ స్థిరమైన కదలికల వల్లే ఇండోనేషియా ఎప్పటికప్పుడు ప్రకంపనలకు గురవుతోంది.

ఇండోనేషియా ప్రధానంగా దీవులతో ఏర్పడిన దేశం. సముద్రంలో లోతైన ప్రాంతాల్లో భూకంపాలు సంభవిస్తే, అవి సునామీలకు దారితీస్తాయి. 2004 హిందూ మహాసముద్ర సునామీ అందుకు ప్రధాన ఉదాహరణ. ఆ ఘటనలో ఇండోనేషియాలోని ఆషే ప్రావిన్స్‌లో లక్షలాది మంది ప్రాణాలు కోల్పోయారు. అందువల్ల భూకంపం సంభవించినప్పుడల్లా సునామీ ముప్పు ఉందనే భయం ఎక్కువగా ఉంటుంది.

రష్యాలోనూ భారీ ప్రకంపనలు:
ఇదే సమయంలో రష్యాలోని పెట్రోపావ్లోవ్స్‌క్ కామ్చాట్‌స్కీ ప్రాంతంలో 7.8 తీవ్రతతో మరొక భారీ భూకంపం నమోదైంది. ఇది భూమికి 10 కిలోమీటర్ల లోతులో ఉద్భవించినట్లు USGS పేర్కొంది. ఈ ప్రకంపనల తర్వాత మరోసారి 5.8 తీవ్రతతో ఆఫ్టర్ షాక్‌లు నమోదయ్యాయి. దీనికి సంబంధించి రష్యా అధికారులు వెంటనే సునామీ హెచ్చరికలు జారీ చేశారు. రష్యా–ఇండోనేషియాలో తక్కువ వ్యవధిలో రెండు శక్తివంతమైన భూకంపాలు సంభవించడం ఆ దేశాల ప్రజల్లో ఆందోళన కలిగించింది. ఇప్పటివరకు పెద్ద నష్టం జరగలేదని అధికారులు చెబుతున్నప్పటికీ, భూకంపాల ప్రభావం ఏ స్థాయిలో ఉందో పూర్తి వివరాలు ఇంకా వెలువడాల్సి ఉంది.