ఐటీ కడితే రేషన్ కార్డు లేనట్టేనా?
మధ్యతరగతిపై కొత్త భారం..
ఖిలావరంగల్లో ప్రజల్లో చర్చనీయాంశం
కాకతీయ, ఖిలావరంగల్: ఇంకమ్ టాక్స్ చెల్లిస్తున్నారనే కారణంతో రేషన్ కార్డులు తొలగించడం సరైన ప్రమాణమా అనే సందేహాలు మధ్యతరగతి కుటుంబాల్లో వ్యక్తమవుతున్నాయి. చిన్న ఆదాయం ఉన్నవారికీ అనర్హుల ముద్ర పడుతోందనే ఆందోళన వ్యక్తమవుతోంది. రాష్ట్రంలో రేషన్ కార్డుల తొలగింపు ప్రక్రియ వేగవంతమవుతున్న నేపథ్యంలో ఈ అంశం చర్చనీయాంశంగా మారింది. అనర్హులను తొలగించడమే ప్రభుత్వ లక్ష్యమని చెప్పినా, తక్కువ ఆదాయం ఉన్న కుటుంబాలపై ప్రభావం పడుతోందని అభిప్రాయాలు వ్యక్తమవుతున్నాయి.
మధ్యతరగతికి పెరుగుతున్న భారం
చిన్న ఉద్యోగాలు, స్వల్ప వ్యాపారాలతో జీవనం సాగిస్తున్నవారు కూడా నిబంధనల ప్రకారం కొద్దిపాటి ఇంకమ్ టాక్స్ చెల్లిస్తున్నారు. అయితే వారి ఆర్థిక పరిస్థితి బలంగా లేకపోయినా, ఐటీ చెల్లిస్తున్నారనే కారణంతో రేషన్ కార్డుల నుంచి తొలగించడం న్యాయమా అనే ప్రశ్నలు వస్తున్నాయి.
రేషన్ కార్డు కేవలం నిత్యావసర సరుకులకు మాత్రమే కాదు. ఆరోగ్యం, విద్య, గృహ పథకాల వంటి అనేక సంక్షేమ కార్యక్రమాలకు ఇది కీలకం. కార్డు లేకపోతే అనేక అవకాశాలు కోల్పోయే పరిస్థితి ఏర్పడుతోంది.
ప్రైవేట్ ఉద్యోగులు, చిన్న వ్యాపారులు, స్వయం ఉపాధి వర్గాలు ఎక్కువగా ఇబ్బందులు పడుతున్నట్లు తెలుస్తోంది. పెరుగుతున్న ఖర్చుల నేపథ్యంలో ప్రభుత్వ సహాయం కోల్పోతే జీవనం మరింత కష్టతరమవుతుందని వారు అంటున్నారు. ఇదిలా ఉండగా, నిజంగా అవసరమైన వారికి సంక్షేమం అందించేందుకే ఈ చర్యలు తీసుకుంటున్నామని అధికారులు చెబుతున్నారు. అయినప్పటికీ కేవలం ఇంకమ్ టాక్స్ ప్రమాణం సరిపోదని, కుటుంబ పరిస్థితులు, ఖర్చులు వంటి అంశాలను కూడా పరిగణనలోకి తీసుకోవాలని నిపుణులు సూచిస్తున్నారు.
