కూల్చిన చోటే పట్టాల పంపిణీ..!
భూదాన్ భూముల్లో పేదలకు ఇళ్ల స్థలాలు
వెలుగుమట్ల భూదాన్ భూముల్లో పట్టాల పంపిణీ సన్నాహాలు
కూల్చివేసిన ఇళ్ల ప్రాంతంలోనే స్థలాల కేటాయింపు
ఏడు వందల ఇళ్లు కూల్చివేత.. ముగ్గురు వందల పదకొండు మందికి టోకెన్లు
డెబ్బై ఐదు గజాల చొప్పున ఐదు ఎకరాల్లో ప్లాట్లు
రేపు ముగ్గురు మంత్రుల చేతుల మీదుగా పట్టాల పంపిణీ
టోకెన్ల ప్రక్రియపై బాధితుల్లో అనుమానాలు
కాకతీయ, ఖమ్మం బ్యూరో : ఖమ్మం నగరంలోని వెలుగుమట్ల ప్రాంతంలో భూదాన్ భూముల వివాదం కొత్త మలుపు తిరుగుతోంది. ఇటీవల అక్కడ జరిగిన కూల్చివేతల తర్వాత ప్రభుత్వం అదే ప్రాంతంలో అర్హులైన పేదలకు ఇళ్ల స్థలాలు కేటాయించేందుకు సిద్ధమవుతున్నట్లు తెలుస్తోంది. కూల్చివేతల వల్ల ఇళ్లు కోల్పోయిన కుటుంబాలకు ప్రత్యామ్నాయంగా పట్టాలు ఇవ్వాలని ప్రభుత్వం నిర్ణయించినట్లు సమాచారం. ఇప్పటికే ఖమ్మం కలెక్టరేట్లో టోకెన్ల జారీ ప్రక్రియ ప్రారంభమైనట్లు అధికార వర్గాలు చెబుతున్నాయి. వెలుగుమట్లలో జరిగిన కూల్చివేతల అంశం గత కొద్ది రోజులుగా పెద్ద చర్చగా మారింది. అక్రమ నిర్మాణాల పేరుతో భారీగా ఇళ్లు కూల్చివేయడంతో బాధిత కుటుంబాలు నిరసనలు వ్యక్తం చేశాయి. ఈ అంశంపై ప్రతిపక్ష పార్టీలు, ప్రజా సంఘాలు కూడా పెద్ద ఎత్తున ఆందోళనలు చేపట్టాయి. దీంతో ప్రభుత్వం ప్రత్యామ్నాయ చర్యలపై దృష్టి సారించినట్లు తెలుస్తోంది.
కూల్చిన చోటే స్థలాల కేటాయింపు
వెలుగుమట్లలో కూల్చివేసిన ప్రాంతంలోనే ఇప్పుడు భూమిని చదును చేసి ప్లాట్లు కేటాయించేందుకు అధికారులు ఏర్పాట్లు చేస్తున్నారు. సుమారు ఐదు ఎకరాల విస్తీర్ణంలో డెబ్బై ఐదు గజాల చొప్పున స్థలాలు కేటాయించనున్నట్లు సమాచారం. ఇటీవల జరిగిన సర్వే ప్రకారం అర్హులైన కుటుంబాలను గుర్తించి వారికి టోకెన్లు జారీ చేస్తున్నట్లు తెలుస్తోంది. మొదటి విడతలో ముగ్గురు వందల పదకొండు మందిని ఎంపిక చేసినట్లు అధికారులు చెబుతున్నారు. రేపు ముగ్గురు మంత్రుల చేతుల మీదుగా పట్టాల పంపిణీ కార్యక్రమం నిర్వహించేందుకు ఏర్పాట్లు జరుగుతున్నాయి. వెలుగుమట్లలో జరిగిన కూల్చివేతలు జిల్లా రాజకీయాల్లో పెద్ద చర్చకు దారితీశాయి. సుమారు ఏడు వందల ఇళ్లు కూల్చివేసినట్లు స్థానికులు చెబుతున్నారు. ఈ ఘటనపై వివిధ పార్టీలు తీవ్ర విమర్శలు చేశాయి. కూల్చివేతల అంశం సామాజిక మాధ్యమాల్లో కూడా విస్తృతంగా చర్చకు వచ్చింది. ఖమ్మం జిల్లాకు చెందిన మంత్రులపై కూడా విమర్శలు రావడంతో ప్రభుత్వం ఇరుకున పడిన పరిస్థితి ఏర్పడింది. ఈ నేపథ్యంలో బాధితులకు ఇళ్ల స్థలాలు కేటాయించేందుకు ప్రభుత్వం ముందుకు వచ్చినట్లు రాజకీయ వర్గాలు చెబుతున్నాయి.
మంత్రుల హామీ.. వేగంగా చర్యలు
బాధితుల సమస్యపై స్పందించిన రెవెన్యూ మంత్రి పొంగులేటి శ్రీనివాసరెడ్డి ఇటీవల ఖమ్మం కలెక్టరేట్లో మీడియాతో మాట్లాడారు. కూల్చివేతల వల్ల ఇళ్లు కోల్పోయిన అర్హులైన కుటుంబాలకు ప్లాట్లు ఇచ్చి ఇళ్లు నిర్మించేందుకు సహాయం చేస్తామని హామీ ఇచ్చారు. ఈ ప్రకటన తర్వాత జిల్లా అధికార యంత్రాంగం వేగంగా చర్యలు ప్రారంభించింది. రెవెన్యూ అధికారులు అర్హులైన వారిని గుర్తించి టోకెన్లు జారీ చేసే ప్రక్రియ చేపట్టారు. ప్రస్తుతం భూమిని చదును చేసే పనులు కూడా యుద్ధప్రాతిపదికన కొనసాగుతున్నాయి.
బాధితుల్లో అనుమానాలు
అయితే పట్టాల పంపిణీ ప్రక్రియపై బాధితుల్లో కొన్ని అనుమానాలు కూడా వ్యక్తమవుతున్నాయి. వెలుగుమట్లలో కూల్చివేసిన ఇళ్ల సంఖ్య ఎక్కువగా ఉన్నప్పటికీ ఎంపికైన కుటుంబాల సంఖ్య తక్కువగా ఉందని కొందరు వాపోతున్నారు. బాధితుల వాదన ప్రకారం సుమారు రెండు వేల దరఖాస్తులు అధికారులు స్వీకరించినట్లు తెలుస్తోంది. కానీ ప్రస్తుతం ముగ్గురు వందల పదకొండు మందికే టోకెన్లు ఇవ్వడం పట్ల అసంతృప్తి వ్యక్తమవుతోంది. మిగిలిన వారికి ఏమవుతుందో స్పష్టత లేదని వారు చెబుతున్నారు. ఇదిలా ఉండగా ఇళ్ల స్థలాల పంపిణీ కార్యక్రమానికి ముందు భూమిని చదును చేసే పనులు వేగంగా సాగుతున్నాయి. కూల్చివేతల తర్వాత అక్కడ మిగిలిన శిధిలాలను తొలగించేందుకు రెవెన్యూ, మున్సిపల్ ఇంజనీరింగ్ అధికారులు భారీ యంత్రాలను వినియోగిస్తున్నారు. పొక్లైన్లు, ట్రాక్టర్లు, టిప్పర్ల సహాయంతో భూమిని సమతలం చేస్తున్నారు. రేపు జరిగే కార్యక్రమానికి ముందు అన్ని ఏర్పాట్లు పూర్తి చేయాలని అధికారులు ప్రయత్నిస్తున్నారు. అయితే అక్కడ ఇళ్లు కోల్పోయిన వారందరికీ స్థలాలు ఇవ్వాలని ప్రతిపక్షాలు, ప్రజా సంఘాలు డిమాండ్ చేస్తున్నాయి. ప్రభుత్వం చేపడుతున్న ఈ చర్యలతో వెలుగుమట్ల వివాదం ముగుస్తుందా లేదా అన్నది ఇప్పుడు స్థానికంగా ప్రధాన చర్చగా మారింది.
