అను‘కొన్నవే’ వచ్చినయా?

అను‘కొన్నవే’ వచ్చినయా?
వరంగల్ బల్దియాకు చేరుకున్న కొత్త వాహనాలు
గతంలో కోట్ చేసిన మోడల్‌కు బదులు మరొకటి సరఫరా
వద్దని వెనక్కి పంపిన జీడబ్ల్యూఎంసీ
మళ్లీ తాజాగా కోరిన వాహనాలే చేరవేత!
కాకతీయ దినపత్రిక అక్షర పోరాట ఫలితం!!

కాకతీయ, వరంగల్ : వరంగల్ మహానగర పాలక సంస్థ (జీడబ్ల్యూఎంసీ) చివరికి తాను అనుకున్నదే సాధించింది. ఒకసారి మోసపోయినా వెంటనే అప్రమత్తమైన బల్దియా అధికారులు సరైన మోడల్ వాహనాలను రప్పించడంలో విజయవంతమయ్యారు. కొంతకాలం క్రితం బల్దియా అవసరాల నిమిత్తం టాటా ఏస్ గోల్డ్ వాహనాల సరఫరా బాధ్యతలను హకా అనే ఏజెన్సీకి అప్పగించారు. అయితే ఆ ఏజెన్సీ నిబంధనలకు విరుద్ధంగా సాధారణ టాటా ఏస్ వాహనాలను పంపించి బల్దియాను మోసం చేయాలని ప్రయత్నించినట్లు ఆరోపణలు వచ్చాయి. ఈ విషయాన్ని గమనించిన బల్దియా అధికారులు వెంటనే స్పందించి, సరఫరా చేసిన వాహనాలను తిరస్కరించారు. కోట్ చేసిన మోడల్‌కు భిన్నంగా వాహనాలు పంపడంపై తీవ్ర అభ్యంతరం వ్యక్తం చేస్తూ, ఒప్పందం ప్రకారం టాటా ఏస్ గోల్డ్ వాహనాలనే సరఫరా చేయాలని స్పష్టం చేశారు. గతంలో పంపిన వాహనాల ధరల్లో తేడా ఉంటే ఆ మొత్తాన్ని తిరిగి చెల్లించాల్సిందేనని హెచ్చరికలు జారీ చేశారు.

కాకతీయ దినపత్రిక కథనంతో కదిలిన వ్యవహారం

బల్దియాకు హకా ఏజెన్సీ చేసిన మోసాన్ని కాకతీయ దినపత్రిక ప్రత్యేక కథనాల ద్వారా వెలుగులోకి తీసుకురావడంతో వ్యవహారం తీవ్ర చర్చనీయాంశమైంది. పత్రికా కథనాల అనంతరం అధికారులు మరింత అప్రమత్తమై, సరైన వాహనాల సరఫరాపై ఒత్తిడి పెంచారు. ఈ క్రమంలో మంగళవారం వరంగల్ బల్దియాకు సుమారు 15 వరకు కొత్త వాహనాలు చేరాయి. అవి బల్దియా కోరిన టాటా ఏస్ గోల్డ్ మోడల్ వాహనాలేనని అధికారులు చెబుతున్నారు. ఉదయం వేళ బల్దియా ప్రధాన కార్యాలయం ఎదుట కొత్త వాహనాలు బారులుగా నిలబడడం స్థానికంగా ఆసక్తిని రేకెత్తించింది. వాహనాల రిజిస్ట్రేషన్ ప్రక్రియ నిమిత్తం వాటిని తరలిస్తున్నట్లు అధికారులు తెలిపారు. అయితే గత అనుభవాల దృష్ట్యా వచ్చిన వాహనాలు నిజంగానే కోరిన మోడల్‌వేనా? లేక పాత తరహా వాహనాలకే ‘గోల్డ్’ స్టిక్కర్లు అతికించారా? అనే సందేహాలు కూడా వ్యక్తమవుతున్నాయి. గతంలో మోసం చేసిన ఏజెన్సీ మరోసారి అదే తరహా ప్రయత్నం చేయదనే గ్యారంటీ లేదని కొందరు అభిప్రాయపడుతున్నారు. ఈసారి మాత్రం అధికారులు పూర్తిస్థాయిలో తనిఖీలు నిర్వహించి, ప్రతి వాహనం స్పెసిఫికేషన్లను ధృవీకరించాల్సిన అవసరం ఉందని ప్రజలు కోరుతున్నారు. కాకతీయ దినపత్రిక అక్షర పోరాటంతో బల్దియా అనుకున్న మోడల్ వాహనాలు రావడం సానుకూల పరిణామంగా మారింది.