పేదల కళ్లల్లో వెలుగులు నింపడమే కాంగ్రెస్ లక్ష్యం
ఇందిరమ్మ ఇళ్ల ప్రారంభోత్సవంలో ఎమ్మెల్యే రేవూరి
కాకతీయ, గీసుగొండ : పేదల కళ్లల్లో వెలుగులు నింపడమే కాంగ్రెస్ ప్రజా ప్రభుత్వ లక్ష్యమని పరకాల ఎమ్మెల్యే రేవూరి ప్రకాశ్ రెడ్డి అన్నారు. మండలంలోని ఎలుకుర్తి హవేలీ గ్రామంలో జరిగిన ఇందిరమ్మ ఇళ్ల గృహ ప్రవేశ కార్యక్రమంలో ఆయన పాల్గొని రిబ్బన్ కట్ చేసి గృహాలను ప్రారంభించారు. లబ్ధిదారులకు స్వీట్లు తినిపించి, శాలువాలతో సన్మానం చేసిన ఎమ్మెల్యే రేవూరి మాట్లాడారు. ప్రజల జీవితాల్లో స్థిరత్వం, భద్రత, అభివృద్ధి అందించడం ఇందిరమ్మ ఇండ్ల పథకం ముఖ్య లక్ష్యమని పేర్కొన్నారు. అర్హులైన ప్రతి ఒక్కరికీ ప్రాధాన్యత క్రమంలో దశలవారీగా ఇండ్లు మంజూరు చేస్తామని తెలిపారు.ఇళ్లు లేని గ్రామాలు లేకుండా రాష్ట్రాన్ని తీర్చిదిద్దడమే ప్రభుత్వ సంకల్పమని స్పష్టం చేశారు.ప్రతి గ్రామంలో మౌలిక వసతుల అభివృద్ధికి ముఖ్యమంత్రి రేవంత్ రెడ్డి కట్టుబడి పని చేస్తున్నారని,పేద కుటుంబాల ఆర్థిక స్థితి బలోపేతంపై ప్రభుత్వం ప్రత్యేక దృష్టి పెట్టిందని ఎమ్మెల్యే రేవూరి అన్నారు.ఈ కార్యక్రమంలో నాయకులు గన్నోజు శ్రీనివాస్ చారి, మండల కాంగ్రెస్ పార్టీ ముఖ్య నాయకులు పాల్గొన్నారు.
