మల్లన్న సాగర్ నిర్వాసితుల సమస్యలపై సీఎం స్పందించాలి
సీఎం పర్యటనలో నిర్వాసితుల సమస్యలు ప్రస్తావించాలి
పునరావాసం, నష్టపరిహారాలపై స్పష్టత కోరిన సిఐటియు
కోర్టు తీర్పులు అమలు చేయాలని డిమాండ్
కాలనీల్లో మౌలిక వసతులు కల్పించాలని విజ్ఞప్తి
న్యాయం చేయకపోతే పోరాటం చేస్తామని సిఐటియు హెచ్చరిక
కాకతీయ, గజ్వేల్ : నర్మెట్టలో జరుగుతున్న రైతు పర్యటనలో ముఖ్యమంత్రి రేవంత్ రెడ్డి మల్లన్న సాగర్ నిర్వాసితుల సమస్యలపై ముందుగా స్పందించి వారికి న్యాయం చేయాలని సిఐటియు జిల్లా ఉపాధ్యక్షుడు బండ్ల స్వామి డిమాండ్ చేశారు. స్థానిక విలేకరులతో మాట్లాడిన ఆయన మల్లన్న సాగర్తో పాటు రంగనాయక సాగర్, కొండపోచమ్మ సాగర్, అనంతగిరి, గౌరవెల్లి ప్రాజెక్టుల నిర్వాసితుల సమస్యలను ప్రస్తావించిన తర్వాతే ఇతర అంశాలపై మాట్లాడాలని కోరారు. నిర్వాసితులను ఆదుకునేలా అధికారులకు స్పష్టమైన ఆదేశాలు ఇవ్వాలని విజ్ఞప్తి చేశారు. ప్రాజెక్టు నిర్మాణ సమయంలో భూసేకరణకు వ్యతిరేకంగా నిర్వాసిత గ్రామాల ప్రజలు ఆందోళనలు చేపట్టిన విషయాన్ని గుర్తు చేశారు. అప్పట్లో ప్రస్తుత ముఖ్యమంత్రి రేవంత్ రెడ్డి కూడా నిర్వాసితుల పక్షాన ఏటిగడ్డ కిష్టాపూర్లో నిరాహార దీక్ష చేసినట్లు తెలిపారు. అయినప్పటికీ గతంలో టిఆర్ఎస్ ప్రభుత్వం నిర్వాసితుల ఆందోళనలను పట్టించుకోకుండా ప్రాజెక్టు పనులు కొనసాగించిందని విమర్శించారు. ఇప్పటికీ సరైన నష్టపరిహారం, పునరావాస ప్యాకేజీలు, ఇండ్లు, ప్లాట్లు అందక ప్రజలు ఇబ్బందులు పడుతున్నారని పేర్కొన్నారు. కొందరు మానసిక వేదనతో ప్రాణాలు కోల్పోయిన ఘటనలు కూడా ఉన్నాయని ఆవేదన వ్యక్తం చేశారు. కోర్టులు నిర్వాసితుల పక్షాన తీర్పులు ఇచ్చినప్పటికీ వాటిని అమలు చేయడంలో అధికారులు విఫలమవుతున్నారని ఆరోపించారు. వెంటనే జోక్యం చేసుకుని కోర్టు తీర్పులు అమలు చేయించేలా చర్యలు తీసుకోవాలని డిమాండ్ చేశారు. నిర్వాసిత కుటుంబాలకు ఎలాంటి షరతులు లేకుండా రైతు బీమా, రైతు భరోసా తరహాలో దీర్ఘకాలిక సహాయం అందించే ప్రత్యేక పథకం ప్రకటించాలని కోరారు. గజ్వేల్ పట్టణంలో ఏర్పాటు చేసిన కాలనీల్లో కనీస మౌలిక వసతులు లేక ప్రజలు ఇబ్బందులు పడుతున్నారని, స్మశాన వాటికలు, విద్య, వైద్య సదుపాయాలు, రహదారులు, డ్రైనేజీ సౌకర్యాలు కల్పించాలని డిమాండ్ చేశారు. ప్రతిపక్షంలో ఉన్నప్పుడు ఇచ్చిన హామీలను గుర్తుచేసుకుంటూ, నేడు నర్మెట్టలో జరిగే సభలో నిర్వాసితుల పట్ల చిత్తశుద్ధిని నిరూపించుకోవాలని కోరారు. లేనిపక్షంలో సిఐటియు ఆధ్వర్యంలో నిర్వాసితులతో కలిసి ఐక్య పోరాటం.
