జస్టిస్ యశ్వంత్ వర్మ కేసు విచారణ నుంచి తప్పుకున్న సీజేఐ బీఆర్ గవాయ్
కాకతీయ, న్యూఢిల్లీ : అలహాబాద్ హైకోర్టు జడ్జి జస్టిస్ యశ్వంత్ వర్మ కేసు విచారణ నుంచి తప్పుకుంటున్నట్లు సీజేఐ బీఆర్ గవాయ్ తెలిపారు. ఇన్హౌజ్ కమిటీ ఇచ్చిన నివేదికను సవాల్ చేస్తూ జస్టిస్ వర్మ సుప్రీంకోర్టులో పిటీషన్ దాఖలు చేసిన విషయం తెలిసిందే. అయితే ఆ పిటీషన్పై విచారణలో పాల్గొనడం లేదని సీజేఐ గవాయ్ అన్నారు. ఢిల్లీలోని తన నివాసంలో భారీ స్థాయిలో నోట్ల కట్టలు దొరికిన కేసులో జస్టిస్ యశ్వంత్ వర్మ ఆరోపణలు ఎదుర్కొంటున్నారు.జస్టిస్ వర్మ కేసును అర్జెంట్గా విచారించాలని సీనియర్ న్యాయవాది కపిల్ సిబల్ కోరారు. ఈ కేసులో రాజ్యాంగపరమైన సమస్యలు ఉన్నాయని, వీలైనంత త్వరగా దీన్ని లిస్ట్ చేయాలని సిబల్ కోరారు. అయితే ఈ కేసులో తాను విచారణ చేపట్టలేనని, ఎందుకంటే తాను కూడా ఇన్హౌజ్ కమిటీలో సభ్యుడిగా ఉన్నానని సీజేఐ గవాయ్ తెలిపారు.సీజేఐగా సంజీవ్ ఖన్నా ఉన్న సమయంలో జస్టిస్ వర్మపై ఇన్హౌజ్ కమిటీ వేశారు. ఈ కేసును మరో బెంచ్కు అప్పగించనున్నట్లు సీజేఐ గవాయ్ తెలిపారు.
