బీఆర్ఎస్ అభ్యర్థి భర్త కిడ్నాప్..
నామినేషన్ వేయకుండా కుట్ర
నల్లగొండలో మంత్రి కోమటిరెడ్డి అనుచరుల ఆగడాలు
బీఆర్ఎస్ నేతల అండతో నామినేషన్ ..
కాకతీయ, తెలంగాణ బ్యూరో: బీఆర్ఎస్ బలపర్చిన సర్పంచ్ అభ్యర్థి మామిడి లక్ష్మి భర్త కిడ్నాప్కు గురైన ఘటన నల్లగొండ జిల్లా తిప్పర్తి మండలం ఎల్లమ్మగూడెంలో చోటుచేసుకున్నది. నామినేషన్ వేయడానికి కారు తీసుకువస్తానని శనివారం ఉదయం బయటకు వెళ్లిన అభ్యర్థి మామిడి లక్ష్మి భర్త యాదగిరి తిరిగి ఇంటికి రాలేదు. ఆందోళనకు గురైన ఆమె స్థానిక నేతలతో కలిసి నల్లగొండలో పార్టీ దీక్షా దివస్లో ఉన్న ముఖ్యులను కలిసేందుకు వచ్చారు. గ్రామంలో పరిస్థితిని, తన భర్త కిడ్నాప్ విషయాన్ని మాజీ ఎమ్మెల్యే కంచర్ల భూపాల్రెడ్డికి వివరించింది. వెంటనే కంచర్ల భూపాల్రెడ్డి.. మామిడి లక్ష్మితోపాటు జడ్పీ మాజీ చైర్మన్ బండా నరేందర్రెడ్డి, మాజీ ఎమ్మెల్యేలు రవీంద్రకుమార్, నల్లమోతు భాస్కర్రావు, పార్టీ నేత దూదిమెట్ల బాలరాజ్యాదవ్తో కలిసి నేరుగా గ్రామానికి చేరుకున్నారు. జిల్లా ముఖ్య నేతలు గ్రామంలో ఉండగా స్థానిక నాయకుల సాయంతో లక్ష్మి సర్పంచ్ అభ్యర్థిగా, పలువురు వార్డు మెంబర్ స్థానాలకు నామినేషన్లను దాఖలు చేశారు.
బెదిరింపులు
మంత్రి కోమటిరెడ్డి వెంకట్ రెడ్డి అనుచరులైన బోల్ల వెంకట్ రెడ్డి, ఉట్కూరి సందీప్ రెడ్డి మా మీదే నామినేషన్ వేస్తావా అంటూ యాదగిరిని కిడ్నాప్ చేసి కత్తితో దాడి చేసి నోట్లో మూత్రం పోసి దారుణంగా కొట్టారని బాధితులు ఆరోపించారు. కాంగ్రెస్ పార్టీ ఓవైపు బీసీలకు 42 శాతం రిజర్వేషన్లు అంటూ మరోవైపు బీసీ అభ్యర్దిని నామినేషన్ వేయనీయకుండా నోట్లో మూత్రం పోసి కొట్టడం దారుణం అంటూ మండిపడ్డారు. కాంగ్రెస్ నాయకుడు ఏకగ్రీవం కోసం ఇతరులెవ్వరూ నామినేషన్ వేయకుండా బెదిరిస్తున్నట్టు బీఆర్ఎస్ నాయకులు ఆరోపించారు. ఇందులో భాగంగానే తన భర్త యాదగిరితోపాటు వార్డు మెంబర్లుగా పోటీ చేయాలనుకుంటున్న బీఆర్ఎస్ కార్యకర్తలకు కూడా బెదిరింపులకు గురిచేశారని తెలిపారు. అయితే పోలీసులకు సమాచారమిఇచ్చినా శనివారం రాత్రి వరకు యాదగిరి ఆచూకీ లభించలేదు. మాజీ ఎమ్మెల్యే కంచర్ల ఎస్పీ, డీఎస్పీలకు ఫిర్యాదు చేశారు.
