ఆగిపోయిన అభివృద్ధికి బీజేపీనే దిక్సూచి
మాజీ మేయర్ బిజెపి నేత సునీల్‌రావు
గ్రామాల భవిత బీజేపీ అభ్యర్థుల విజయంపైనే ఆధారితం
కాకతీయ, కరీంనగర్ : సర్పంచ్ ఎన్నికలు సమీపిస్తున్న నేపధ్యంలో గంగాధర మండలంలోని ప్రతి గ్రామం అభివృద్ధి దిశగా సాగాలంటే భారతీయ జనతా పార్టీ అభ్యర్థులను గెలిపించాలని మాజీ మేయర్ యాదగిరి సునీల్‌రావు పిలుపునిచ్చారు. మండల కేంద్రంలో జరిగిన మీడియా సమావేశంలో ఆయన మాట్లాడుతూ గ్రామాలకు భారీగా విడుదల కానున్న కేంద్ర నిధులు పాలకవర్గాల ఏర్పాటుపైనే ఆధారపడి ఉన్నాయని గుర్తుచేశారు.గ్రామపంచాయతీల్లో పాలకవర్గాలు లేకపోవడం వల్లే 15వ ఆర్థిక సంఘం కింద వచ్చే రూ.3,000 కోట్ల నిధులు నిలిచిపోయాయని, సర్పంచ్‌లు ఎన్నికై పాలకవర్గం ఏర్పడిన వెంటనే ఆ నిధులు గ్రామాలకు చేరుతాయని తెలిపారు. ఈ విషయాన్ని మంత్రి పొంగలేటి శ్రీనివాస్‌రెడ్డి కూడా ఇటీవల స్పష్టంగా ప్రకటించారని ఆయన గుర్తుచేశారు. రాష్ట్రంలో కాంగ్రెస్ ప్రభుత్వం ఏర్పాటు అయిన రెండేళ్ల నుంచి గ్రామాల అభివృద్ధి పూర్తిగా నిలిచిపోయిందని అన్నారు. లైట్ చెడితే మార్చే స్థితి లేదని, బ్లీచింగ్ పౌడర్, పారిశుధ్య సామగ్రి, వాటర్ సప్లై సమస్యలు పరిష్కరించేందుకు నిధుల్లేవని, స్పెషల్ అధికారుల పాలనలో గ్రామాలు నష్టపోయాయని విమర్శించారు. గ్రామాల్లో నరేగా నుంచి పల్లెప్రకృతి వనం వరకు ప్రధాన రహదారుల నిర్మాణం నుండి వైకుంఠధామాల పనుల వరకు,ప్రతి అభివృద్ధి కార్యక్రమం కేంద్ర నిధులతోనే సాగుతున్నదని చెప్పారు. ప్రధానమంత్రి గ్రామీణ సడక్ యోజన, సీఆర్ఐఎఫ్ నిధులు ద్వారా పెద్ద ఎత్తున రహదారులు నిర్మాణం జరుగుతుండటం ఇందుకు నిదర్శనమని, జగిత్యాల ,వరంగల్ జాతీయ రహదారి నిర్మాణానికి రూ.2,500 కోట్ల టెండర్లు పూర్తికావడం కూడా కేంద్రం కట్టుబాటును చూపుతున్నదని వివరించారు. ఎంపీ ల్యాడ్స్ నిధులతో బండి సంజయ్ కుమార్ గ్రామాలలో పలు అభివృద్ధి కార్యక్రమాలు, విద్యార్థులకు సైకిళ్లు, ఫీజుల సహాయం వంటి కార్యక్రమాలు చేపడుతున్నారని గుర్తుచేశారు. కార్యక్రమంలో బీజేపీ మండల అధ్యక్షుడు ప్రశాంత్, నాయకులు శ్రవణ్, రాజు, నాగరాజు, రాములు తదితరులు పాల్గొన్నారు.
