వరంగల్ సీపీగా అవినాశ్ మహంతి ?
రాష్ట్ర ప్రభుత్వం కీలక నిర్ణయం !
త్వరలోనే ఉత్తర్వులు జారీ !
జిల్లాలో లా అండ్ ఆర్డర్పై ప్రత్యేక దృష్టి
సోషల్ మీడియాలో విస్తృత ప్రచారం
పోలీస్ గ్రూపుల్లో చక్కర్లు కొడుతున్న పోస్టులు
ప్రస్తుతం సైబరాబాద్ సీపీగా మహంతి విధులు
ఆయన తండ్రీ, సోదరుడు ఐపీఎస్ ఆఫీసర్లే..
కాకతీయ, తెలంగాణ బ్యూరో: వరంగల్ పోలీస్ కమిషనర్గా అవినాశ్ మహంతిని నియమించాలని ప్రభుత్వం నిర్ణయం తీసుకున్నట్టు ప్రచారం జరుగుతోంది. ప్రస్తుతం సైబరాబాద్ సీపీగా విధులు నిర్వహిస్తున్న అవినాష్ గతంలో సైబరాబాద్ జాయింట్ కమిషనర్ ఆఫ్ పోలీస్గా, సైబరాబాద్లో డీసీపీ (ట్రాఫిక్)గా, జాయింట్ కమిషనర్ ఆఫ్ పోలీస్ (డిటెక్టివ్ డిపార్ట్మెంట్)గా పనిచేశారు. కాగా మహంతి నియామకాన్ని స్థానిక మంత్రులు, కొందరు ఎమ్మెల్యేలు వ్యతిరేకిస్తున్నట్లు సమాచారం. రాష్ట్ర ప్రభుత్వం మాత్రం లా అండ్ ఆర్డర్ను అదుపులో పెట్టేందుకు మహంతిని తీసుకొచ్చేందుకు సిద్ధమైందని కొన్ని పోలీస్ గ్రూపులు, సోషల్ మీడియాలో వార్త చక్కర్లు కొడుతోంది. అయితే ఐజీ స్థాయి అధికారి వరంగల్కు వచ్చే అవకాశం ఉందా ? అని పోలీస్ వర్గాల్లో ప్రచారం జరుగుతోంది.
ఒకే కుటంబంలో ముగ్గురు ఐపీఎస్లు
ప్రస్తుతం సైబరాబాద్ పోలీస్ కమిషనర్గా విధులు నిర్వహిస్తున్న అవినాష్ .. గతంలో సైబరాబాద్ జాయింట్ కమిషనర్ ఆఫ్ పోలీస్గా, సైబరాబాద్లో డీసీపీ (ట్రాఫిక్)గా, జాయింట్ కమిషనర్ ఆఫ్ పోలీస్ (డిటెక్టివ్ డిపార్ట్మెంట్)గా విధులు నిర్వహించారు. 2005 బ్యాచ్కు చెందిన అవినాష్ మహంతికి తెలంగాణ పోలీస్ డిపార్ట్మెంట్లో ప్రత్యేక గుర్తింపు ఉంది. ఈయన తండ్రి సీనియర్ పోలీస్ ఆఫీసర్ ఏకే మహంతి. హైదరాబాద్ పోలీస్ కమిషనర్గా, డీజీపీగా పనిచేసి రిటైర్ అయ్యారు. సోదరుడు అభిషేక్ మహంతి కూడా ఐపీఎస్ ఆఫీసరే. తాను ఎక్కడ పనిచేసినా నిజాయతీకి మారుపేరులా, అక్రమార్కుల పాలిట సింహస్వప్నంలా వ్యవహరిస్తారని పేరుంది. కరీంనగర్ పోలీస్ కమిషనర్గా ఆయన తనదైన ముద్రవేశారు. కబ్దాదారులు, ఆర్థిక నేరగళ్లపై ఉక్కుపాదం మోపారు. మాజీ ముఖ్యమంత్రులు ఎన్టీఆర్, మర్రి చెన్నారెడ్డి, కోట్ల విజయభాస్కర్ రెడ్డి, చంద్రబాబు నాయుడు, వైఎస్ రాజశేఖర్ రెడ్డి, నల్లారి కిరణ్ కుమార్ రెడ్డి హయాంలో అవినాష్ మహంతి తండ్రి ఏకే మహంతి కీలక బాధ్యతలు నిర్వర్తించారు. అనంతరం ఏపీ గవర్నర్కి సలహాదారుగా వ్యవహరించారు. నిజాయతీ కలిగిన పోలీస్ ఆఫీసర్గా పేరు తెచ్చుకున్న ఏకే మహంతి ఇద్దరు కుమారులు అవినాష్, అభిషేక్ ఐపీఎస్ అధికారులే కావడం విశేషం.
