గట్టమ్మ దేవాలయం వద్ద ట్రాఫిక్ నియంత్రణకు ఏర్పాట్లు
కాకతీయ, ములుగు ప్రతినిధి: ఆసియా ఖండంలోని అతిపెద్ద గిరిజన జాతరగా ప్రసిద్ధి చెందిన మేడారం శ్రీ సమ్మక్క సారలమ్మ జాతర ప్రారంభం సమీపిస్తున్న వేళ, భక్తుల భారీ రద్దీ అంచనా నేపథ్యంలో ట్రాఫిక్ నియంత్రణపై ములుగు జిల్లా పోలీసులు ముందస్తు ఏర్పాట్లను వేగవంతం చేశారు. భక్తులు మొదటగా దర్శించే గట్టమ్మ దేవాలయం వద్ద వాహన రద్దీ నియంత్రణ అత్యంత కీలకమని జిల్లా ఎస్పి కేకాన్ సుధీర్ రామనాథ్ పేర్కొన్నారు. గట్టమ్మ దేవాలయ పరిసరాల్లో భక్తుల భారీ సంఖ్యలో హాజరవటం, వాహనాల రాకపోకలు పెరగనున్న నేపథ్యంలో ప్రత్యామ్నాయ రహదారి సదుపాయం, పార్కింగ్ వ్యవస్థలను పునర్‌వ్యవస్థీకరించేందుకు ఎస్‌పీ జిల్లా అటవీ అధికారి కిషన్ జాదవ్ తో కలిసి మైదానస్థాయిలో పరిశీలించారు. ప్రభుత్వం, ప్రైవేట్ వాహనాల కోసం ప్రత్యేక పార్కింగ్ జోన్లను నిర్ణయించే దిశగా ప్రణాళికలు సిద్ధం చేశారు.
జాతర సమయంలో ట్రాఫిక్ నిరాటంక ప్రవాహం మా ప్రధాన ఎజెండా అని, భక్తులకు ఎలాంటి అసౌకర్యం కలగకుండా ముందస్తుగానే అన్ని ఏర్పాట్లు చేస్తున్నాం అని ఎస్‌పీ తెలిపారు.
ఈ పరిశీలన కార్యక్రమంలో డీఎస్పీ ములుగు రవీందర్, ఫారెస్ట్ రేంజ్ ఆఫీసర్ శంకర్, స్పెషల్ బ్రాంచ్ ఇన్స్పెక్టర్ శంకర్, ములుగు సీఐ సురేష్, ఎస్సై వెంకటేశ్వర్లు, పోలీసులు పాల్గొన్నారు.
