మూతపడనున్న అల్ ఫలాహ్.. మరి ఆ 600 విద్యార్థుల పరిస్థితేంటి..?
ఎర్రకోట బ్లాస్ట్ తర్వాత అల్ ఫలాహ్పై అనుమానాల మబ్బు
ఈడీ దాడులతో యూనివర్సిటీ చుట్టూ పెరుగుతున్న ఉద్రిక్తత
భవిష్యత్తు ఏంటో తెలీక విద్యార్థుల గుండెల్లో గుబులు
కాకతీయ, నేషనల్ డెస్క్ : దేశ రాజధాని ఢిల్లీలో ఇటీవల ఎర్రకోట వద్ద జరిగిన కారు బాంబు బ్లాస్ట్ దేశాన్ని కలవరపరిచింది. 13 మంది అక్కడికక్కడే ప్రాణాలు కోల్పోయగా, 20 మందికిపైగా తీవ్రంగా గాయపడ్డారు. ఈ ఘటనలో ప్రధాన నిందితులు హర్యానాలోని అల్ ఫలాహ్ యూనివర్సిటీలో పనిచేస్తున్నవారేనని దర్యాప్తు సంస్థలు గుర్తించడంతో పరిస్థితి ఒక్కసారిగా మారిపోయింది. దీంతో యూనివర్సిటీపై అనుమానాల మబ్బు కమ్ముకుంది. అల్ ఫలాహ్ మూతపడనుందని కూడా ప్రచారం జరుగుతోంది. మంగళవారం ఈడీ భారీ దాడులు జరపటం, ఫండ్స్–బ్యాంకు లావాదేవీలను పరిశీలించడం మరింత ఆందోళనకు దారి తీసింది.
దాదాపు 600 మంది విద్యార్థులు చదువుతున్న ఈ యూనివర్సిటీని ఇప్పుడు టెర్రర్ డెన్ అని పిలుస్తూ సోషల్ మీడియాలో క్షోభ వ్యక్తం అవుతోంది. కాలేజీని మూసేయాలి, పునాదులతో నేలమట్టం చేయాలి అంటూ కొందరు వర్గాలు ప్రచారం చేస్తున్నారు. కానీ, ఈ ప్రచారం వెనక వందలాది విద్యార్థుల భవిష్యత్తు ఉందన్న విషయం ఎవరూ పట్టించుకోవట్లేదు. ముఖ్యంగా మెడికల్ బ్రాంచ్లో చదువుతున్న వారు తీవ్ర ఆందోళనకు గురవుతున్నారు.
యూనివర్సిటీలో ఎంబీబీఎస్ చదువుతున్న ఓ విద్యార్థి తన బాధను మీడియాతో పంచుకున్నారు. “మా యూనివర్సిటీని టెర్రర్ డెన్ అంటున్నారు. రేపు కాలేజీ మూసేస్తే మా ఫ్యూచర్ ఏంటి? ఐదు సంవత్సరాలు కష్టపడ్డాం, లక్షలు ఖర్చు పెట్టాం. కానీ ఇప్పుడు ఆస్పత్రులు కూడా మమ్మల్ని నమ్మే పరిస్థితి లేదు” అని ఆవేదన వ్యక్తం చేశాడు.
ఒకవేళ అల్ ఫలాహ్ యూనివర్సిటీపై తీవ్రమైన చర్యలు తీసుకుంటూ క్యాంపస్ మూసివేత వరకు వెళ్లితే.. మొదట దెబ్బతినేది మెడికల్, ఇంజనీరింగ్, అడ్మినిస్ట్రేషన్ విభాగాలే. ప్రభుత్వం జోక్యం చేసుకుంటే విద్యార్థులను ఇతర యూనివర్సిటీలకు మైగ్రేట్ చేసే అవకాశం ఉంటుంది. కానీ దేశంలో మెడికల్/ప్రొఫెషనల్ కోర్సుల్లో ఖాళీలు చాలా తక్కువ. అందువల్ల అందరికీ సీట్లు లభిస్తాయన్న హామీ లేదు. నీట్ కష్టం, కోచింగ్, ఫీజులు, హాస్టల్ ఛార్జీలు.. ఇవి అన్నీ కలిపితే విద్యార్థులు ఇప్పటికే లక్షల్లో కాదు, కోటీల్లో పెట్టుబడి పెట్టి ఉంటారు. యూనివర్సిటీ మూతపడ్డట్లయితే ఈ మొత్తం ఒకే రోజులో అర్థంలేనిది అవుతుంది. ఈ పరిణామాల నడుమ ఆ 600 విద్యార్థులు ఎప్పుడు ఏం జరుగుతుందో తెలీక అల్లాడిపోతున్నారు.
