ఎన్నికల ఏర్పాట్లపై అదనపు కలెక్టర్ సమీక్ష
కాకతీయ, జనగామ : జనగామ జిల్లా రఘునాథపల్లి మండలంలో జరుగుతున్న గ్రామ పంచాయతీ ఎన్నికల ఏర్పాట్లు, నామినేషన్ ప్రక్రియను అదనపు కలెక్టర్ (లోకల్ బాడీస్) పింకేష్ కుమార్ గురువారం పరిశీలించారు. మొదటగా మండల పరిషత్ అభివృద్ధి అధికారి (ఎంపీడీవో ) కార్యాలయాన్ని సందర్శించిన అదనపు కలెక్టర్, పోలింగ్ స్టేషన్ల సిద్ధత, సిబ్బంది కేటాయింపు, ఎన్నికల సామగ్రి అందుబాటు, భద్రతా చర్యలు వంటి అంశాలపై సమగ్ర సమీక్ష నిర్వహించారు. ఎన్నికల ప్రక్రియ పారదర్శకంగా, నిష్పాక్షికంగా, ఎలాంటి అంతరాయం లేకుండా చూడాల‌ని అధికారుల‌కు సూచ‌న‌లు చేశారు. అనంత‌రం ఖిలాషాపూర్ క్లస్టర్‌లో జరుగుతున్న నామినేషన్ ప్రక్రియను పరిశీలించారు. నామినేషన్ ప్రక్రియను పూర్తిస్థాయి పారదర్శకతతో, చట్టబద్ధంగా నిర్వహించాలని ఎన్నికల సిబ్బందికి ఆదేశాలు జారీ చేశారు. కార్య‌క్ర‌మంలో ఎంపీడీవో రఘునాథపల్లి, ఎంపీఓ, ఎన్నికల విభాగ సిబ్బంది, లైన్ డిపార్ట్‌మెంట్ అధికారులు పాల్గొన్నారు.
