- భారత మార్కెట్లో విస్త‌ర‌ణ ల‌క్ష్యంగా కంపెనీ నిర్ణ‌యం
కాకతీయ, బిజినెస్ డెస్క్ : టెస్లా కంపెనీ భారతదేశంలో తన కార్యకలాపాలను ముందుకు తీసుకెళ్లేందుకు లంబోర్ఘిని ఇండియా మాజీ అధిపతి శరద్ అగర్వాల్‌ను నియమించుకుంది. భారత మార్కెట్లో టెస్లా పనితీరును మెరుగుపరచడానికి మరియు అమ్మకాలను పెంచడానికి ఈ నియామకం ఒక ముఖ్యమైన వ్యూహాత్మక చర్యగా మార్కెట్ వ‌ర్గాలు పేర్కొంటున్నాయి. గతంలో టెస్లా భారత కార్యకలాపాలను చైనా మరియు ఇతర ప్రాంతీయ కేంద్రాలలో ఉన్న బృందాలు పర్యవేక్షించేవి. అయితే అగర్వాల్ ఇప్పుడు దేశంలోనే ఉండి పూర్తిస్థాయిలో ప‌ర్య‌వేక్ష‌ణ చేప‌డుతూ ముందుకు తీసుకెళ్ల‌నున్నారు. శరద్ అగర్వాల్ లగ్జరీ కార్ల విభాగంలో విస్తృతమైన అనుభవాన్ని కలిగి ఉన్నారు. లంబోర్ఘిని ఇండియాలో దాదాపు ఒక దశాబ్దం పాటు పనిచేసిన ఆయన, ఆ బ్రాండ్‌ను ప్రధాన మెట్రో నగరాల నుంచి టైర్-1 మరియు టైర్-2 నగరాలకు విస్తరించడంలో కీలక పాత్ర పోషించారు. అగర్వాల్ నియామకంతో టెస్లా భారతదేశంలోని హై-ఎండ్ లగ్జరీ కార్ల కొనుగోలుదారులపై దృష్టి సారిస్తోందని విశ్లేషకులు భావిస్తున్నారు. గత టెస్లా ఇండియా కంట్రీ హెడ్ ప్రశాంత్ మీనన్ మే 2025లో రాజీనామా చేశారు.
