కౌశిక్ రెడ్డి బోగస్ ప్రచారాలు మానుకో
: హుజురాబాద్ కాంగ్రెస్ నియోజకవర్గ ఇన్‌చార్జి వొడితల ప్రణవ్
కాకతీయ, కరీంనగర్ : పట్టణాల అభివృద్ధికి కాంగ్రెస్ ప్రభుత్వం భారీ నిధులు కేటాయించిందని హుజురాబాద్ కాంగ్రెస్ నియోజకవర్గ ఇన్‌చార్జి వొడితల ప్రణవ్ స్పష్టం చేశారు. హుజురాబాద్ పట్టణానికి రూ.15 కోట్లు, జమ్మికుంట పట్టణానికి రూ.15 కోట్లు, ప్రత్యేక అభివృద్ధి నిధుల కింద రూ.10 కోట్లు, హుజురాబాద్ మున్సిపాలిటీకి మరో కోటి 8 లక్షలు మంజూరైనట్లు తెలిపారు. అదనంగా హుజురాబాద్‌కు ఐటీఐ (ఏటీసీ) కాలేజీని కూడా ప్రభుత్వం ఆమోదించినట్లు చెప్పారు.ఈ మేరకు ప్రణవ్ సోషల్ మీడియాలో విడుదల చేసిన వీడియోలో మాట్లాడుతూ ఉపఎన్నికల తర్వాత నియోజకవర్గ అభివృద్ధికి ఒక్క రూపాయి కూడా రాకపోయింది. కానీ కాంగ్రెస్ అధికారంలోకి వచ్చిన 20 నెలల్లోనే సుమారు రూ.40 కోట్ల నిధులు వచ్చాయి. దీనికి ముఖ్యమంత్రి రేవంత్ రెడ్డి, మంత్రి తుమ్మల నాగేశ్వరరావు, పొన్నం ప్రభాకర్, దుద్దిళ్ల శ్రీధర్ బాబుకు కృతజ్ఞతలు తెలియజేస్తున్నాను అని అన్నారు.కౌశిక్ రెడ్డి సోషల్ మీడియాలో బోగస్ ప్రచారాలు చేస్తూ అబద్ధాలు చెబుతున్నారని ఆయన విమర్శించారు. ఎమ్మెల్సీ, ప్రభుత్వ విప్‌గా ఉన్నప్పటికీ కౌశిక్ రెడ్డి హుజురాబాద్ అభివృద్ధికి రూపాయి నిధులు కూడా తెచ్చలేదని, చిత్తశుద్ధి ఉంటే తాను ఏం సాధించాడో చెప్పాలని ప్రణవ్ డిమాండ్ చేశారు.వీణవంక–నరసింగాపూర్ రహదారిని కూడా పూర్తి చేయలేని కౌశిక్ రెడ్డి 30 కోట్ల నిధులు తెచ్చానని చెప్పడం హాస్యాస్పదం కాంగ్రెస్ ప్రభుత్వం మంజూరు చేసిన నిధులను కేసీఆర్ మంజూరు చేసినట్టు చూపించడం ప్రజలు నవ్వుకునే విషయం అని వ్యాఖ్యానించారు. రాబోయే రోజుల్లో హుజురాబాద్‌కు మరిన్ని నిధులు తెచ్చి అభివృద్ధి పథంలో ముందుకు తీసుకువెళ్తామని ప్రణవ్ హామీ ఇచ్చారు.
