మంత్రి కొండా సురేఖ ఇంటి ముట్టడి
రూ.18వేల వేతనం అమలు చేయాలని ఆశల డిమాండ్
హన్మకొండలో భారీ ర్యాలీతో నిరసన
మంత్రి ఇంటి వద్ద పోలీసులతో తోపులాట.. ఉద్రిక్త
కాకతీయ, హన్మకొండ టౌన్ : ఆశా వర్కర్లకు రూ.18,000 ఫిక్స్డ్ వేతనం ప్రకటించి అమలు చేయాలని ప్రభుత్వం తక్షణ చర్యలు తీసుకోవాలని సీఐటీయూ రాష్ట్ర కార్యదర్శి రాగుల రమేష్ డిమాండ్ చేశారు. ఎన్నికల హామీలను నెరవేర్చాలని ఆయన స్పష్టం చేశారు. శుక్రవారం హనుమకొండలోని మంత్రి కొండా సురేఖ నివాసాన్ని ఆశా వర్కర్లు ముట్టడించారు. రామ్నగర్లోని సుందరయ్య కార్యాలయం నుంచి భారీ ర్యాలీగా బయలుదేరిన హనుమకొండ, వరంగల్ జిల్లాల ఆశాలు నినాదాలు చేస్తూ మంత్రి ఇంటి వద్దకు చేరుకున్నారు. పోలీసులు భారీ బందోబస్తు ఏర్పాటు చేసి లోనికి వెళ్లకుండా అడ్డుకున్నారు. మంత్రి నివాసంలోకి ప్రవేశించేందుకు ప్రయత్నించిన సిఐటియు నాయకులు, ఆశాలను పోలీసులు అడ్డుకోవడంతో తోపులాట చోటుచేసుకుంది. రెండు గంటలపాటు అక్కడే నిరసన వ్యక్తం చేస్తూ ప్రభుత్వానికి వ్యతిరేకంగా నినాదాలు చేశారు. ఈ సందర్భంగా రాగుల రమేష్ మాట్లాడుతూ ఆశాలకు రూ.50 లక్షల ఇన్సూరెన్స్, రూ.50 వేల అంత్యక్రియల ఖర్చులు, ప్రమోషన్లు, రిటైర్మెంట్ బెనిఫిట్స్, ప్రసూతి సెలవులు, ఆదివారం, పండగ సెలవులు కల్పించాలని కోరారు. ఎ.ఎన్.సి, పి.ఎన్.సి టార్గెట్లను రద్దు చేయాలని డిమాండ్ చేశారు. తెలంగాణ ఆశా వర్కర్స్ యూనియన్ రాష్ట్ర వర్కింగ్ ప్రెసిడెంట్ కాసు మాధవి, సిఐటియు వరంగల్ జిల్లా కార్యదర్శి అరూరి కుమార్ మాట్లాడుతూ పెండింగ్ పారితోషికాలు, పి.ఆర్.సి ఏరియర్స్, లేప్రసి సర్వే, పల్స్ పోలియో, ఎన్నికల డ్యూటీలకు సంబంధించిన బకాయిలను వెంటనే చెల్లించాలని డిమాండ్ చేశారు. మార్చి 28న చలో అసెంబ్లీ కార్యక్రమాన్ని విజయవంతం చేయాలని పిలుపునిచ్చారు. ఈ కార్యక్రమంలో సుంచు రాజేశ్వరి, బైరి శోభ, జనగాం శ్వేత, సిహెచ్ శ్రీవాణి, పద్మ, సిహెచ్ రాణి, రమ, కవిత, రజిత, ఈసంపల్లి శోభ, కరుణలత, లీల, పుష్ప, ప్రేమలత తదితరులు పాల్గొన్నారు.
