బాలికలకు హెచ్‌పీవీ టీకాలు అందించాలి

బాలికలకు హెచ్‌పీవీ టీకాలు అందించాలి
గర్భాశయ క్యాన్సర్ నివారణకు టీకా కీలకం
అర్హులైన బాలికలను గుర్తించి వ్యాక్సినేషన్
జిల్లా ఆసుపత్రులు, సిహెచ్‌సిల్లో టీకాలు
గ్లకోమాపై అవగాహన కార్యక్రమాలు
అదనపు కలెక్టర్ పి. శ్రీనివాస రెడ్డి

కాకతీయ, ఖమ్మం : అర్హులైన బాలికలకు పూర్తి స్థాయిలో హెచ్‌పీవీ వ్యాక్సినేషన్ అందించాలని అదనపు కలెక్టర్ పి. శ్రీనివాస రెడ్డి అధికారులను ఆదేశించారు. సోమవారం కలెక్టరేట్ సమావేశ మందిరంలో నిర్వహించిన సమావేశంలో హెచ్‌పీవీ వ్యాక్సినేషన్ కార్యక్రమంపై జిల్లా అధికారులకు పలు సూచనలు జారీ చేశారు. ఈ సందర్భంగా ఆయన మాట్లాడుతూ మహిళా దినోత్సవం సందర్భంగా జిల్లా కలెక్టర్ అనుదీప్ దురిశెట్టి హెచ్‌పీవీ వ్యాక్సినేషన్ కార్యక్రమాన్ని ప్రారంభించారని తెలిపారు. 14 సంవత్సరాలు పూర్తి చేసి 15 సంవత్సరాల లోపు ఉన్న బాలికలకు ఈ టీకా వేయడం ద్వారా గర్భాశయ ముఖ క్యాన్సర్‌ను నివారించే అవకాశం ఉంటుందని అన్నారు. ఖమ్మం ప్రభుత్వ జనరల్ ఆసుపత్రి, నేలకొండపల్లి, తిరుమలాయపాలెం, కల్లూరు, మధిర, పెనుబల్లి, సత్తుపల్లి, వైరా ఏరియా ఆసుపత్రుల్లో ప్రతి రోజు ఉదయం 9 నుంచి మధ్యాహ్నం 1 గంట వరకు వ్యాక్సినేషన్ అందిస్తున్నట్లు తెలిపారు. జిల్లాలో సుమారు 11,460 మంది బాలికలు ఈ వయస్సు గలవారని అంచనా ఉందని చెప్పారు. బాలికల తల్లిదండ్రులకు టీకా వల్ల కలిగే ప్రయోజనాలపై అవగాహన కల్పించి ఎక్కువ మంది టీకా తీసుకునేలా చర్యలు తీసుకోవాలని సూచించారు. అలాగే మార్చి 8 నుంచి మార్చి 14 వరకు గ్లకోమాపై అవగాహన కార్యక్రమాలు నిర్వహించాలని అధికారులకు ఆదేశించారు. సమావేశంలో జిల్లా అధికారులు పాల్గొన్నారు.